Алғаш ана тілімізде жазылған «Жасанды интеллект әліппесі» кітабының тұсаукесер салтанаты өтті. Кітаптың таныстырылымына халықаралық сарапшылар, зиялы қауым өкілдері мен технология саласының мамандары қатысты.
Алматы қаласындағы «Smart Point» ғимаратында өткен шарада Мемлекеттік сыйлықтың иегері, Түркі дүниесі Жазушылар одағының төрағасы Ұлықбек Есдәулет, белгілі медиа-менеджер, Қазақстанның еңбек сіңірген қайраткері Нұржан Жалауқызы, әдебиеттанушы-ғалым Мамай Ахетов, Қазақ ұлттық қыздар педагогикалық университетінің ректоры Гүлмира Қанай, сондай-ақ іс-шараға онлайн қосылған шетелдік сарапшылар жылы лебіздерін білдірді.
Кітап авторы – ЖИ саласын бірнеше жылдан бері зерттеп келе жатқан білікті маман Мейіржан Әуелханұлы. Ол жиналған қауымға кітапты жазуға не түрткі болғаны, қандай қиындықтарға тап болғаны туралы баяндады. Тұсаукесерден кейін автор оқырмандар сұрағына жауап берді. Онда ұлттық және ақпараттық қауіпсіздік, отандық ЖИ әлеуеті, кітап жазу үрдісі, сондай-ақ ЖИ саласындағы тәуекелдер мен мүмкіндіктер секілді түрлі тақырыптар қамтылды.
Мейіржан Әуелханұлының «Жасанды интеллект әліппесі» деп аталатын бұл еңбегі 1000 дана таралыммен «Al‑HuB publishing» баспасынан шыққан. Автордың айтуынша, кітаптың таралымын арттыру жоспарда бар.
– Жыл соңына дейін 25-30 мың данамен шығарсақ деген ойдамыз. Кітаптың алдыңғы 100 бетінде жасанды интеллект деген не, жасанды интеллект этикасы, жасанды интеллектпен бірге келген әртүрлі мәселелер қамтылған. Өздеріңіз білесіздер, жасанды интеллектінің өмірге келуімен жалған ақпарат та көп тарай бастады. Сол жалғанды қалай ажыратамыз және жасанды интеллектінің болашағы қандай болады? Жасанды интеллект туралы заңдар қалай қабылдануы керек деген ұғымдар қарастырылған. Кейінгі екі жүз беті – жиырма жеті салаға арналған промпттар. Бұл еңбектің мақсаты – жалпы қазақ тіліндегі оқырманға жасанды интеллект ұғымын ІТ саласының тілінде емес, ғылым тілінде емес, қарапайым тілде түсіндіру, – деді Мейіржан Әуелханұлы.
Шара барысында TurkAI – түркі мемлекеттерінің жасанды интеллектшілер қауымдастығының құрылғаны хабарланды. Салалық «AI-hub» компаниясы мен Аi-hub.kz сайты таныстырылды.
«AI-hub» компаниясының негізін қалаушы Ержанар Әшейхан қазақ аудиториясы цифрлық дамудан қалыс қалмауы үшін ауқымды стратегия әзірленгенін мәлімдеді. Компания жасанды интеллект, IT, киберқауіпсіздік және цифрлық технологияларды дамытуға бағытталған. «AI-Hub Publishing» баспасы бұл кітапты жарыққа шығарып, алдағы уақытта жаратылыстану, IT және жасанды интеллектке қатысты әлемдік еңбектерді қазақ тіліне аударуды жоспарлап отыр. Сонымен қатар жасанды интеллект терминдерін қалыптастыру және энциклопедия әзірлеу бастамасы көтерілді.
Ерзат АСЫЛ
