Дүбірлі дода Алматы облысы Талғар ауданындағы «Almaty Horse and Polo Club» ат спорты клубында өтті. Жарысқа жеті ел – Қазақстан, Қырғызстан, Ресей, Моңғолия, Мажарстан, Қытай мен Өзбекстаннан 18 және одан жоғары жастағы спортшылар қатысты.
Екі күнге созылған тартысты бәсекеде жалпыкомандалық есеп бойынша 1-орынды Қазақстан құрамасы (6 алтын медаль) иеленді. Моңғолия мен Қытай құрамасы 2-орын, Қырғызстан құрамасы 3-орын алды.
IV Азия чемпионатында қазақстандық спортшылар Азамат Серғазин, Алмат Латипбек, Расул Құрайыш, Есімхан Рахматулла, Сырым Ізбасаров және Біржан Қосалиев топ жарды.
Әр салмақ дәрежесі бойынша кубок, медаль, диплом және ақшалай сыйлықтар табысталды.
Чемпионаттың жүлде қоры 10 800 000 теңгені құрады.
Чемпионатты Қазақстан Республикасының туризм және спорт министрлігі, Алматы облыстық дене шынықтыру және спорт басқармасы, Дүниежүзілік ат спорты федерациясы (World Federation of Horseback Wrestling), ҚР ұлттық спорт түрлері қауымдастығы, «Аударыспақ федерациясы» РҚБ ұйымдастырды. Аудараспақтан IV Азия чемпионатына «Atasu Group» халықаралық көлік-логистикалық компаниясы және “Нұрбанк” демеушілік жасады.
