Жамбыл ауданында көктемгі дала жұмысы жүйелі түрде атқарылуда. Аграрлы өңірде егін шаруашылығымен айналысатын шаруа қожалықтарының саны 2 мыңға жуықтайды. Диқандар ауа райының қолайлы күндерін барынша тиімді пайдалануға тырысып, науқандық жұмысты уақытылы және сапалы атқаруға біркісідей жұмылған.
Аудандық ауыл шаруашылығы бөлімінің мәліметі бойынша, көктемнің алғашқы айынан бастап 86 мың гектарға ылғал жабылған. Себу алдында 50 мың гектар шамасындағы алқап өңделді. Жер жырту жұмысы да оңтайлы мерзімде басталып, 26 мың гектар егістікке соқа салынды. Осы дайындалған алқаптарға басты дақыл саналатын – арпа, бидай, сұлы сияқты жаздық дәнді дақылдар егілді. Сонымен қатар 4900 гектарға майлы дақылдар, 1141 гектарға көкөніс тұқымы сіңірілді. Сондай-ақ бақша дақылдары – 695 гектарға, картоп 1621 гектарға себілді. Ал 47634 гектарға мал азығы дақылдары, көпжылдық шөп егілген.
Көктемгі дала жұмысына трактор, соқа, тырма, тұқымсепкіш, топырақ қопсытқыш сияқты ұзын-саны 1400-дей ауылшаруашылық техникалары жұмылдырылды. Ауданда ауыл шаруашылығы мақсатындағы егістік жердің жалпы көлемін өткен жылмен салыстырғанда биыл 1 мың гектарға ұлғайту көзделіп отыр. Осылайша жалпы аудан бойынша егіс алқабы 106,1 мың гектарға жеткізілмек.
Шаруаларға мемлекет тарапынан жан-жақты қолдау көрсетіледі, арзандатылған жанар-жағармай, минералды тыңайтқыштар беріліп, жаңа техникамен қамтамасыз етуде жеңілдіктер ұсынылады. «ҚазАгроҚаржы» АҚ арқылы қолжетімді техника сатып алу мүмкіндігі қарастырылған. Былтыр жалпы құны 453 млн теңге болатын 35 техника алынса, биыл 50 техникаға өтінім берілген. Бүгінге дейін 135 млн теңгенің 14 техникасы шаруалар қолына тиді. Ауылшаруашылық техникасының тозу көрсеткіші аудан бойынша 45 пайызды құрайды. Шаруа қожалықтары техника жаңарту ісіне белсенді қатысуда.
Серік САТЫБАЛДИЕВ
Жамбыл ауданы
