Мемлекет басшысы Қасым-Жомарт Тоқаевтың ғалымдармен өткен кездесуі еліміздегі ғылымның стратегиялық маңызын тағы бір мәрте айқындап берді. Президенттің: «Ғалым – ұлттың шамшырағы» деген тұжырымы – ғылым иелеріне берілген зор баға, сондай-ақ, ұлттың даму жолындағы басты бағдардың бірі екенінің дәлелі.
Шын мәнінде, ғылым – табандылықты, еңбекқорлықты және үздіксіз ізденісті талап ететін күрделі жол. Бұл салада табысқа жету үшін тек кәсіби білім емес, сондай-ақ жаңашыл ойлау, адалдық және елге деген шынайы қызмет қажет. Президент атап өткен ядролық энергетика, жасанды интеллект, IT, қолданбалы зерттеулер мен ғылыми хабтар құру – еліміздің интеллектуалдық серпілісін қамтамасыз ететін маңызды бағыттар.
Ғылым мен білімді экономикалық тиімділікпен ұштастыру туралы Мемлекет басшысының пікірі бүгінгі заман талабына толық сай. Ғылыми зерттеулердің мемлекет пен бизнеске нақты пайда әкелуі – ғылымның өмірмен тығыз байланысын көрсететін маңызды өлшем. Бұл бағытта ғылыми нәтижелерді коммерцияландыру, ғылымды өндіріске енгізу сынды мәселелер өзекті болып отыр.
Сондай-ақ, жас ғалымдарға қолдау көрсету, ғылыми инфрақұрылымды жаңғырту және академиялық еркіндікке жол ашу – ғылымды жаңа деңгейге көтерудің кепілі. Ұлы Абайдың «Ғылым таппай мақтанба» деген өсиеті бүгінде бұрынғыдан да маңызды мәнге ие. Елдің дамуы тек білім мен ғылымға сүйенген жағдайда ғана тұрақты әрі сенімді болады.
Президенттің сөзі – әрбір ғалым мен ұстаз үшін үлкен серпіліс пен жауапкершілік. Еліміздің ертеңі ғылым мен инновацияға тікелей байланысты екенін терең ұғына отырып, біз бірлесе отырып, жарқын болашаққа бастар жолды бірге қалыптастыруымыз керек.
Гүлнұр Рашева әл-Фараби атындағы ҚазҰУ
Кеден, қаржы және экологиялық құқық кафедрасының
аға оқытушысы, PhD докторы
