Рухани мықты елдің іргесі берік, мәдени дамыған ұлттың ұстанымы мығым болады. Осыны анық аңғарған Мемлекет басшысы Қасым-Жомарт Тоқаев барша халықты кітап оқуға шақырды. «Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз. Кітапхана – мемлекеттің, ұлттың негізгі жады. Сондықтан кітапхана ісін дамытуға бейжай қарауға болмайды», – деді Президент.
Осы ойлы пікірден соң елімізде 23 сәуір – Ұлттық кітап күні деп жарияланды. Биыл алғашқы рет атап өтілген бұл мереке еліміздің түкпір-түкпірінде түрлі бағытта, әртүрлі жоба аясында өтті. Қарадалалық қарақұрым оқырман да айтулы шараны өз деңгейінде ұйымдастырды. Атап айтсақ, Тасқарасу ауылдық кітапханасында “Кітап – ең жақын дос” атты тәрбие сағаты, Ақтам ауылдық кітапханасында “Кітапхана түні”, Рахат ауылдық кітапханасында “Біз кітаппен біргеміз”, Тиірмен ауылдық кітапханасында “Кітап – достық амбассадоры” атты акциялар өтті. Осындай ауқымды шаралар Әл-Фараби атындағы аудандық кітапханада қорытындыланды.
Жиналған көпшілікке көрмеге қойылған әдебиет алыптарының кітаптары таныстырылды. Көш түзеген «Кітап керуені» де жаңашылдықтың лебін еседі. Абай, Ахмет, Мұқағали, ұйғыр халқынан шыққан ақын Илияның бейнесін сомдаған әртістер де келген қонақтарға сөз өнерінің құдіретін ұғындырып, кітаптың қазына екенін танытып жатты.
Алғашқы құттықтау сөз алған Ұйғыр ауданының әкімі Бота Елеусізова бұл мерекенің ерекшілігі мен құндылығына тоқталып, барша қауымды кітап оқуға шақырды. Сонымен қатар кітапханадағы белсенді оқырмандар мен отбасымен кітап оқуды дәстүрге айналдырған жанұяларды марапаттады. Ал аудандық ақсақалдар кеңесінің төрағасы Жәнет Керімқұлов бұл мереке Алаш арыстарының ойымен үндес екенін жеткізді. Өзінің жеке кітапханасындағы жүзге тарта кітапты парасат ордасына сыйға тартты. Ардагер ұстаз, ақын Мамытқан Құдайбергенов, аудандық аналар кеңесінің төрағасы Гүлжахан Әликеевалар да мінбеге көтеріліп, толғамды ой, тұщымды пікір айтты. Ал ақындар Әбдіғани Асанғожа, Жазира Бақаева, Ерған Мұхамәдиұлы жырдан шашу шашты.
Мерекелік шара балалардың жыр шумақтарымен, «Жазерке», «Арзу» ансамбльдерінің өнерпаздарының ән шашуымен жалғасты. Кітапхана ұжымы қонақтарға «Абайдың қара сөздерін» тарту етті. Ең құнды да бағалы сыйлық осы болды бұл күні.
Анар Дүйсенбайқызы
Ұйғыр ауданы
