Қарасай ауданындағы «Нұр-Аман» спорт кешенінде тұңғыш рет әйелдер арасында волейболды отырып ойнаудан Қазақстан Республикасының кубогы өтті. Турнирге еліміздің төрт аймағынан тірек-қимыл аппараты зақымданған 40-тан астам спортшы қатысты. Салтанатты шарада мұндай жарыстар ерекше қажеттілігі бар адамдардың қоғамға белсенді араласуына мүмкіндік беретін алаң екені айтылды.
«Елімізде параволейболдың дамып келе жатқанына 30 жылға жуықтады. Әсіресе, соңғы 10 жылда ерекше қарқын алды. 2018 жылы Қазақстан параволейбол федерациясы құрылды. Қазіргі таңда республика бойынша 12 филиалы бар. Былтыр ерлер құрамасы Паралимпиада ойындарына жолдама алып қана қоймай, Париж төрінде сәтті ойын көрсете білді. Әлемнің түкпір-түкпірінен келген 78 команда арасында 5-орын алды. Ал әйелдер волейболы елімізде енді ғана өз жолын бастады. Тұңғыш рет өтіп жатқан Қазақстан Республикасының кубогі паралимпиадалық спортты дамытуға серпін береді деп ойлаймын», – деді Қазақстан параволейбол федерациясының вице-президенті, параволейболдан ҚР ұлттық құрамасының бас бапкері Бауыржан Тахауов.
Волейболды отырып ойнау ережелері мүгедек жандардың мүмкіндіктерін ескере отырып жасалған. Әр командада алты адам ойнайды. Мұнда тор қалыпты стандарттан төменірек орналасқан. Алаңның өлшемі – 10х6 метр.
«Мен бала кезімнен волейболмен айналыстым. Кейін ауыр науқастан бір аяғымнан айырылғанда қатты күйзелдім. Бірақ сонда да сүйікті спортыммен қош айтысқым келмеді. Жеңіске деген жігер алға қарай жетеледі. Әрбір спортшының арманы – Олимпиада шыңын бағындыру. Сол мақсатқа жету жолында бар күш-жігерімді саламын», – дейді Алматы облысы атынан қатысқан Жазира Мұқашева.
Жарыста әрбір спортшы әдемі ойын өрнегін көрсетуге тырысты. Олардың ұмтылыстары көрерменді тәнті етті. Нәтижесінде Астана қаласының командасы І орын алды. ІІ орын Жетісу облысының өкілдеріне, ал ІІІ орын Алматы облысының командасына бұйырды.
Өз тілшіміз
Қарасай ауданы
