Абай атындағы Қазақ ұлттық педагогикалық университетінің филология факультеті мен «Өрлеу» біліктілікті арттыру ұлттық орталығы» АҚ «Алматы облысы бойынша кәсіби даму институты» филиалының арасындағы ынтымақтастық туралы меморандум аясында «Болашақ педагогты әдістемелік қолдау: нәтижелі амалдар және озық тәжірибелер» тақырыбында екікүндік республикалық әдістемелік десант ұйымдастырылды. Шараның негізгі мақсаты – болашақ педагогтарға әдістемелік қолдау көрсету үшін тәжірибе алаңын құру.
Аталған шара аясында болашақ мұғалімдер білім беру үдерісінде тиімді әдістерді қолдану мүмкіндіктерімен танысты. Шара педагогикалық қауымдастық өкілдері арасында кәсіби ынтымақтастықты нығайтып, болашақ мамандарды кәсіби тұрғыда қолдаудың жаңа бағыттарын айқындауға ықпал етті.
Республикалық әдістемелік десанттың бірінші күні Абай атындағы Қазақ ұлттық педагогикалық университетінің бас оқу ғимаратында өтті. Шараның ашылуында филология факультетінің деканы, ф.ғ.д., профессор А.Таңжарықова және «Өрлеу» БАҰО АҚ «Алматы облысы бойынша КДИ» филиалының директоры Қ.Нұрлыбаев сөз сөйледі.
Әдістемелік десант аясында білікті мамандар өз тәжірибелерімен бөлісті. Талғар ауданы №39 мектебінің директоры М.Арынбаева «Жас маманның алғашқы жылы: қиындықтар мен жеңу жолдары» тақырыбында баяндама жасап, студенттердің сұрақтарына жауап берді. «Өрлеу» БАҰО АҚ «Алматы облысы бойынша КДИ» филиалының кафедра меңгерушісі, PhD доктор М.Бисенбаева мәтіндердің құрылымдық, стильдік, жанрлық ерекшеліктерін талдауға арналған тапсырмаларды ортаға салды. Институт тренері Л.Орманбекова дарынды оқушылармен жүргізілетін жұмыс түрлері бойынша тренинг өткізді. Сондай-ақ педагог-шеберлер – Ә.Молдабеков атындағы №6 орта мектебінің мұғалімі Н.Абдрахманова, К.Әзірбаев атындағы №15 орта мектебінің мұғалімі К.Саттыбекова, №45 мектеп-гимназиясының мұғалімдері – педагог-зерттеуші Д.Талғатұлы және педагог-сарапшы Д.Карина қазақ тілі сабақтарында айтылым мен тыңдалым дағдыларын дамытуға арналған тиімді әдістерді ұсынып, оқу сауаттылығын жетілдіру жолдарымен таныстырды.
Әдістемелік десанттың екінші күніне жоспарланған тренингтер Абай атындағы Қазақ ұлттық педагогикалық университетінің «Abai Library» конференц-залында өтті. Шараны «Шетел тілдері» кафедрасының меңгерушісі, PhD доктор С. Иватов ашты. Онда білім беру саласының тәжірибелі мамандары ағылшын тілін оқытудың заманауи тәсілдері мен тиімді әдістемелерін ортаға салды. Осы орайда Абай атындағы ҚазҰПУ «Шетел тілдері» кафедрасының қауымдастырылған профессоры м.а Г.Нүрекешова мазмұнды баяндама жасап, өз іс-тәжірибесімен бөлісті.
Әдістемелік десант соңында ұйымдастырылған ашық диалог пен кері байланыс алаңының маңызы зор болды. Онда болашақ педагогтар мен тәжірибелі мамандар еркін пікір алмасып, өз ойларын ортаға салды. Студенттер үшін арнайы ұйымдастырылған сұрақ-жауап алаңы өзара сенім мен қолдау атмосферасын қалыптастырып, олардың бойында кәсіби жауапкершілік пен педагогтік ұстанымды нығайтты. Екі күнге созылған республикалық әдістемелік десант – болашақ педагогтарға әдістемелік қолдау көрсетудің тиімді алаңы ғана емес, сонымен қатар кәсіби шабыт пен жаңа серпін берген маңызды педагогикалық іс-шара болды. Шара соңында барлық қатысушыға Алғыс хат табысталды.
Қарлығаш Бесірова,
«Өрлеу» БАҰО» АҚ «Алматы облысы бойынша Кәсіби даму институты»
филиалының редакциялық-баспа қызметі бойынша жетекші маманы
