Облыста ауылшаруашылық мақсаттағы пайдаланылмай жатқан жерлерді қайтару жөніндегі жүйелі жұмыс жалғасуда. Осы жылдың басынан бері мемлекет меншігіне 39,8 мың гектар жер қайтарылып үлгерді. Соның ішінде 5,5 мыңы – сот шешімі бойынша қайтса, ал қалған 34,3 мың гектарды жерпайдаланушылар өз еріктерімен берген.
Аталған жұмыс ел Президентінің жер ресурстарын тиімді пайдалану және олардың игерусіз бос жатуына жол бермеуге бағытталған тапсырмасын орындау аясында жүргізілуде. Әкімдіктің мәліметіне қарағанда, жыл соңына дейін мемлекет меншігіне бұдан бұрын заң талаптарын бұза отырып берілген немесе мақсатсыз пайдаланыста жатқан 90 мыңға жуық гектарды қайтару көзделіп отыр.
«Жерді тұрақты пайдалану фермерлікті дамыту мен азық-түлік қауіпсіздігіне жол ашады. Біздің мақсатымыз – жазалау немесе жер телімін тартып алу емес, басты міндет – жерді іске қосу үшін қайтару. Иелігіндегі жер телімін өз еркімен қайтарғандар ешқандай әкімшілік шаралардың қысымына ұшырамайды», – деп атап өтті облыстық жер қатынастары басқармасының басшысы Аманжол Әбдірахманов.
Ауыл шаруашылық жерлерді пайдалануды бақылау космо-мониторинг көмегімен жүзеге асады, ал аймақтарда мобильді топтар жұмыс істейді. Жылдар бойы өз жер телімдерін пайдаланбайтын ірі латифундистерге ерекше назар аударылады.
Қорыта айтқанда, жерді ауылшаруашылық айналымына енгізу жөніндегі жұмыс барлық ауданда жүзеге асырылуда. Мемлекет меншігіне қайтарылған жерлер адал кәсіп иесі – ауылшаруашылық өнімдерін өндірушілерге қайта ұсынылатын болады. Бұл тұрғыда шағын және орта агробизнес басымдыққа ие.
Бейбіт МЕКЕЕВ
