Қапшагай су қоймасының жағалауында Қазақстан Республикасы Жастар арасындағы VI спорттық ойындары аясында өткен желкенді спорттан жарыс өз мәресіне жетті.
Бірнеше күн бойы су қоймасының акваториясы шынайы тартыс алаңына айналды: еліміздің әр аймағынан келген 60-тан астам спортшы желкенді қайықтарды басқарудағы шеберлігін, төзімділігін және желді еңсеру қабілетін көрсетті.
«Жастар ойындары – болашақ желкенді спорттың іргетасы. Дәл осындай алаңдарда тәжірибе жинақталады, болашақ чемпиондар шыңдалады. Олар ертең еліміздің атынан әлемдік ареналарда өнер көрсетеді. Біз қатысушылардың дайындығының жоғары деңгейде болғанына қуаныштымыз. Бүгінгі таңда еліміздің жеті аймағында желкенді спорт белсенді дамып келеді. Бұл спорт түрі – тек ептілік пен техника ғана емес, сондай-ақ тәртіп, стратегиялық ойлау және командалық жұмыс. Бүгінгі жарыстар бұқаралық және кәсіби спортты дамытуға, аймақтар арасындағы достықты нығайтуға, мықты ұрпақты тәрбиелеуге қосылған үлес», – деді Қазақстан Республикасы желкенді спорт федерациясының вице-президенті Мақсұт Нарбаев.
Ауа райының құбылмалы болғанына қарамастан, жарыс жоғары деңгейде ұйымдастырылды. Қатысушылардың жасы — 14 пен 23 жас аралығында. Мамандардың айтуынша, жастар ойыны – спортшыларға нақты тартыс жағдайында өз күшін сынап көруге, болашақ халықаралық регаталарға қажет тәжірибе алуға тамаша мүмкіндік. Айта кетейік, жеңімпаздар мен жүлдегерлерге 2025 жылдың қараша айында Малайзияда өтетін халықаралық регатаға қатысу мүмкіндігі беріледі.
«Капшагай су қоймасының акваториясы – еліміздегі желкенді спорт үшін ең үздік орындардың бірі. Мұндай ауқымды турнирді қабылдап отырғанымызға қуаныштымыз. Бұл жарыс аймақтың спорттық туризмін дамытуға және желкенді спортқа деген қызығушылықты арттыруға сеп болды. Биылғы жарыстарда біз еліміздің желкенді спорттағы болашағы бар жас буынды көрдік. Біздің балалар су бетінде көп жаттықты, маневр мен старттық тактиканы жетілдірді. Соның нәтижесінде жалпыкомандалық 1-орынды жеңіп алды. Бұл жеңіске толық лайықты. Балалар бар күшін салып, жақсы нәтиже көрсетті», – деді Алматы облысының бас жаттықтырушысы Олег Куливацкий.
15 жастағы қонаевтық спортшы Жандаулет Өмірзақ бұл біріншілікке бір айдан астам уақыт дайындалды. Ол 6 жыл ішінде жасөспірімдер арасында ел чемпионы атағын бес рет жеңіп үлгерген.
— «Мен 10 жасымнан бері желкенді спортпен айналысамын. Жүлделерім өте көп. Бұл жолы «Луч-мини» және «470» класстары бойынша жеңімпаз болдым. Желкенді спорт тек қайықты басқаруға емес, өзіңді жеңуге, кез келген жағдайда шешім қабылдауға үйретеді. Жел бағыты өте күрделі болды, бірақ мен өзімді көрсетіп, командамның жеңіске жетуіне үлес қоса алғаныма қуаныштымын. Осындай үлкен турнирге қатысуға мүмкіндік бергені үшін жаттықтырушыларыма және ұйымдастырушыларға алғыс айтамын», – деді желкенді спорттан ҚР спорт шебері Жандаулет Өмірзақ.
Жандаулет Өмірзақ «470» классы бойынша ұлдар арасында үздік атанса, қыздар арасында тағы бір қонаевтық спортшы Тұрсынай Әшірбай жеңімпаз атанды.
Сондай-ақ, Алматы облысының атынан қатысқан келесі спортшылар чемпион атанды:
- Антон Гаас («Луч» класы),
- Руслан Алексеенко және Снежанна Рау («Луч-радиал»),
- Алексей Андреев және Милана Мамедова («Луч-мини»),
- Илья Иванов, Тахир Джикатов, Таисия Ильина және Мария Коваленко («Кадет»),
- Валерия Хамидуллина («Оптимист»),
- Максим Шкиль («Финн»).
«Луч-2» класында 2-орынды Данил Боцман мен Захар Соин иеленді. Айта кетейік, барлық жүлдегерлер – республикалық деңгейдегі жарыстардың бірнеше дүркін қатысушылары мен жеңімпаздары.
Жалпыкомандалық есепте алғашқы үштікке Алматы облысынан бөлек Түркістан және Маңғыстау облыстарының яхташылары енді.
