Қонаев шаһарында көрермен көңілін ойлы сөз бен сазды әуен әуезіне бөлеген «Махаббат портында жүздескенше» атты поэтикалық кеш өтті. Аспан астында самал жел лебіне елітіп, толқын ырғағына тебіреніп, лаулаған от ұшқынына ұйыған ақындар мөлдір жырын төгілтіп, әнші-композиторлар сазды әнін шырқады.
Кеш облыстық орталық әмбебап кітапханасының ұйымдастыруымен халық жүрегінен орын алған сыршыл ақын Тұманбай Молдағалиевтің 90 жылдығына арналды. Шараға Ұлықбек Есдәулет, Қадырғали Көбентай, Мұрат Шаймаран, Жақсыбек Қалелбек, Бағдат Мүбәрак, Қуат Қайранбаев, Мөлдір Айтбай, Мұхтар Күмісбек, Ақгүл Айдарбекқызы және өзге де жыр жүйріктері мен бұлбұл үнді таланттар қатысты.
– Кітапхана ұжымы ұйымдастыратын шаралардың барлығы ғимарат ішінде өтетін. Осы дәстүрлі қағиданы бұзып, поэтикалық кешті ашық аспан астында, жағалау маңында өткізуді жөн көрдік. Шара тақырыбын махаббатқа арнадық. Адамдар бір-біріне деген сүйіспеншілігін, махаббатын өлеңмен жеткізсе деген ниетпен алғаш рет осындай форматта ұйымдастырып отырмыз, – деді облыстық орталық әмбебап кітапханасының директоры Ғалия Тоқабаева.
Поэтикалық кеш шымылдығын ашқан көрнекті ақын, Мемлекеттік сыйлықтың лауреаты, ТҮРКСОЙ Жазушылар одағының төрағасы Ұлықбек Есдәулет Тұманбай Молдағалиев жайлы естелігімен бөлісіп, ерекше бағыттағы шараның маңызына да тоқталып өтті.
– Көріксіз өмірге көрік беретін, сүреңсіз тұрмысқа ажар бітіретін – өнер, оның ішінде поэзия. Өнер өмірдің көлеңкесі емес, керісінше жан-жүрегі. Сондықтан мұндай шараның өтуі көңіл қуантады. Ұйымдастырушыларға алғысым шексіз. Қапшағай толқынының өзі шабыт шақырады. Поэзиялық кештің бітеу зал ішінде емес, шалқар дария жағасында өтуі ақындарға да, тыңдарманға да ерекше әсер береді. Табиғат өлеңді тудырса, өлеңді сол табиғат аясында оқыған екі есе ғажап. Поэзия жұрттың құлағына жетіп, жүрегінен орын алу керек. Меніңше, Қонаев жағалауы осындай поэзиялық кештерге сұранып тұрғандай. Мұны халықаралық деңгейде ауқымын кеңейтіп өткізсе, тіптен ғанибет болар еді, – дей келе жыр тасқынын ағытты.
Жас ақын Ақгүл Айдарбекқызы мұндай бастамалар ақынға қанат бітіретінін жеткізді. «Қайнаған тіршілік қамымен өлең жазу өте қиын. Осындай кештерге келіп, көңілің толысып, ләззат алып, артынан өлеңдер туады», – деді ол.
Осылайша жағалауға жан бітіріп, көңілге нәр берген поэтикалық кеш өлеңсүйер қауымның жүрегінен орын алды. «Жырым мені ешқашан өлтірмейді, Әнім, мені алысқа жетелерсің», – деп жырлаған Тұманбай ақынның рухы да бір шалқыған шығар?!
Гүлзат БАЙҚОНЫСОВА
Қонаев қаласы
