Қазіргі таңда ақпараттық технологиялар дамығанымен, шалғай ауыл жастарының АИТВ (адамның иммун тапшылығы вирусы) туралы хабардарлығы әлі де жеткіліксіз. Бұл – қоғам үшін маңызды әрі алаңдатарлық мәселе.
АИТВ – адамның иммундық жүйесін әлсіретіп, түрлі ауруларға қарсы тұру қабілетін төмендететін вирус. Дегенмен, ерте анықтау және уақтылы ем қабылдау АИТВ-мен өмір сүретін адамдар ұзақ әрі сапалы өмір сүруге мүмкіндік алады.
Алайда, ақпараттың тапшылығы мен жалған түсініктер салдарынан кейбір жастар АИТВ туралы нақты әрі сенімді білімге ие емес. Әсіресе, шалғай елді мекендерде бұл мәселе өзекті болып отыр.
Жастардың хабардар болуына кедергі келтіретін негізгі себептер болып ашық ақпараттың тапшылығы — мектептер мен колледждерде АИТВ тақырыбын қамтитын арнайы сабақтар сирек өткізіледі. Ұялу мен стигма — бұл тақырыпты ата-анамен, ұстазбен немесе медицина қызметкерлерімен ашық талқылау әлі де қиын. Интернет пен медиа ресурстардың шектеулігі — сенімді дереккөздерге қол жеткізу мүмкіндігі аз. Жастарға арналған орталықтар туралы хабарсыздық — мобильді медицина мен сенім қызметтері туралы ақпарат аз таралған.
АИТВ-ның алдын алу және жастардың ақпараттық деңгейін арттыру мақсатында Алматы облысында ағымдағы жылдың 9 айында мектептер мен колледждерде бірқатар тренингтер, семинарлар және акциялар өткізілді. Бұл шаралармен 48 027 оқушы қамтылды.
Іс-шара барысында қатысушылар АИТВ жұқтыру қаупі жоғары жағдайларды талдап, алдын алу жолдарын, жедел тестілеу мүмкіндіктерін және басқа да маңызды аспектілерді қарастырды. Сонымен қатар, мамандар жастардың сауалдарына нақты жауап беріп, АИТВ туралы дұрыс түсінік қалыптастыруға ықпал етті.
Мұндай кездесулер тек ақпарат берумен шектелмейді — олар жастар мен медицина қызметкерлері арасындағы сенімді көпір қалыптастырады.
Жастар – ел болашағы. Сондықтан олардың өз денсаулығына жауапкершілікпен қарауы және АИТВ туралы нақты ақпаратқа ие болуы аса маңызды.
Білімді таңдау – қауіпсіз өмірдің кепілі.
Ал АИТВ-сыз болашақ – әрқайсымыздың саналы әрекетімізден басталады!
Самал Қожалимова,
ШЖҚ «ЖИТС-ның алдын алу және оған қарсы күрес жөніндегі Алматы облыстық орталығы» КМК Ұйымдастыру-әдістемелік бөлім меңгерушісі
