Облыс әкімі аппараты басшысының орынбасары Айбар Теменовтің төрағалығымен аймақ делегациясы Қытай Халық Республикасының Нинся-Хуэй автономиялық ауданы өкілдерімен кездесті. Онда құрғақшылықтың алдын алуға бағытталған жобалар талқыланып, сондай-ақ экология, ауыл шаруашылығы, жасыл энергетика салаларындағы байланысты нығайту мәселелері сөз болды.
Айбар Талғатұлы Қазақстан мен Қытай арасындағы байланыстың дамуына «Бір белдеу – бір жол» бастамасы зор үлес қосып жатқанын айтты. Сондай-ақ 33 жыл бойғы дипломатиялық қарым-қатынас нәтижесінде екі ел арасында сенімді әрі тату көршілік байланыс орнағанын атап өтті.
Қазақстан тарапынан кездесуге кәсіпкерлік және индустриялық-инновациялық даму, табиғи ресурстар, тұрғын үй-коммуналдық шаруашылық, жастар саясаты, ауыл шаруашылығы басқармаларының өкілдері қатысты. Қытай делегациясының құрамында ауданның сыртқы істер, орман және дала шаруашылығы басқармасы, шөлейттенуге қарсы халықаралық ынтымақтастық орталығы, экологиялық және көлік корпорацияларының басшылары болды.
Тараптар құрғақшылық, жердің тозуы мен мұздықтардың еруі сияқты климат қолайсыздығынан болатын қатерлерге қарсы біріге жұмыс істеудің маңызына тоқталды. Осыған орай шөлейттенуге қарсы орталық құру туралы ұсыныс келіссөздердің негізгі тақырыбына айналды. Сондай-ақ сауда-экономикалық қатынасты дамыту жайы да талқыланды. Соңғы екі жылда Алматы облысы мен Қытай арасындағы тауар айналымы 1 миллиард АҚШ долларынан асқан. Өңірде Қытай инвесторларының қатысуымен 150-ге жуық кәсіпорын табысты жұмыс істеуде.
Нинся-Хуэй автономиялық ауданы Қытайдағы экологиялық тұрғыдан ең таза өңірлердің бірі және жасыл энергетиканы белсенді енгізіп келеді.
– Нинсяның құрғақ жерлерді қалпына келтірудегі тәжірибесі мен Қазақстанның егіншілік саласындағы жетістіктері бірлескен жобаларды жүзеге асыруға берік негіз қалайды. Қоршаған ортаны қорғау – екі ел үшін де маңызды міндеттің бірі. Осы мақсат бізді біріктіреді, – деді «Нинмяо» Нинся экологиялық құрылыс корпорациясы директорлар кеңесінің төрағасы Юй Гэньминь.
Кездесу барысында тараптар Алматы облысы мен Нинся-Хуэй автономиялық ауданы арасында орнаған достық қатынастар туралы келісім мен өткен жылы Инчуань қаласында қол қойылған достық жөніндегі меморандум аясындағы өзара келісімдерді орындауға ниетті екендерін айтты. Бұл құжаттар өнеркәсіп, ауыл шаруашылығы және білім беру салаларындағы бірлескен бастамаларды дамытуға берік негіз болды.
Жиын барысында жастар мәселесіне де ерекше көңіл бөлінді. Аймақаралық келісім студент алмасу және «Нинся» халықаралық достық лагеріне қатысу бағдарламасын жүзеге асырып, мәдени және білім беру саласын нығайтуға, жастардың көшбасшылық дағдыларын дамытуға оң әсерін тигізген. Делегация өкілдері білім беру, медицина және энергетика салаларындағы ынтымақтастықты жалғастыруға, сондай-ақ Қытай компанияларының Алматы облысындағы индустриялық және логистикалық аймақтарда жұмыс істеу мүмкіндігін қарастыруға уағдаласты.
Шара соңында Айбар Теменов: «Қытай халқында «Адамдар бірігіп әрекет етсе, тауды да орнынан қозғалта алады» деген даналық сөз бар. Бүгінгі келіссөз бірлескен жаңа жобалардың іске асуына жол ашады деп сенеміз», – деп кездесуді қорытындылады.
Гүлзат БАЙҚОНЫСОВА
