Алматы облысы еліміздегі жетекші инвестициялық орталықтардың бірі ретіндегі позициясын нығайтып келеді. Бұған Алматы қаласында өткен «Alatau Investment Forum – 2025» халықаралық бизнес-форумы дәлел бола алады. Жиынға көршілес мемлекеттердің 300-ден астам бизнес-қоғамдастық өкілі қатысып, өнеркәсіп, агрокешен, логистика және туризм салаларында жүзеге асырылатын жаңа жобаларды талқылады.
Шарада сөз алған облыс әкімі Марат Сұлтанғазиев Қазақстан Республикасының Сыртқы істер министрлігі атынан қатысушыларды «Alatau Investment Forum – 2025» халықаралық форумының ашылуымен шын жүректен құттықтады.
– Форумға келген шетелдік делегацияларға ерекше ризашылығымды білдіремін. Циндао қаласының вице-мэрі Гао Цзянь бастап келген Қытай Халық Республикасының, сондай-ақ Қырғыз Республикасының және басқа да мемлекет өкілдерінің шараға қатысуы инвестициялық әріптестікті нығайта түседі, – деді облыс әкімі.
Марат Елеусізұлы өз сөзінде инвесторлардың сеніміне, стратегиялық әріптестікке және ауқымды жобаларды жүзеге асыруға негізделген экономикалық өсудің жаңа кезеңі басталғанын мәлімдеді. Бұл ретте Алматы облысы еліміздің ең серпінді дамып келе жатқан аумақтарының бірі саналатынын жеткізді. Аймақта инвесторлар үшін нақты жағдайлар жасалғанын, заманауи инфрақұрылымдық хабтар, жұмыс істеп тұрған жеті және қалыптасып жатқан тоғыз индустриялық аймақ, логистикалық парктер, мемлекеттік-жекеменшік әріптестік тетіктері және «Бірыңғай терезе» цифрлық сервистері бар екенін алға тартты.
– Инвесторлардың сенімі нақты көрсеткіштен байқалады, – деді аймақ басшысы. – Алматы облысында аяқталған бастамаларды қоспағанда, 6,2 трлн теңгеге 216 инвестициялық жобаға мониторинг жүргізілуде. Бұл жобаларды іске асыру 80 мыңнан астам тұрақты жұмыс орнын құруға мүмкіндік береді. Біз шетелдік серіктестермен ынтымақтастыққа ерекше назар аударамыз. Бүгінгі таңда 72 жоба шетелдік капиталдың қатысуымен іске асырылуда, ал олардың жиынтық құны 3,9 трлн теңгеге жетеді. Бұл – жай ғана статистика емес, халықаралық компаниялардың аймақ болашағына сенетіндігінің, оны ұзақ мерзімді орнықты дамитын перспективалы алаң ретінде көретіндігінің дәлелі!
Өз кезегінде сөз алған Қытай Халық Республикасының Циндао қаласының вице-мэрі Гао Цзянь Алматы облысымен ынтымақтастықты нығайту жолдарын атап өтіп, Қазақстан мен Қытай арасындағы әріптестіктің стратегиялық маңызына тоқталды. Ол Циндаоның экономикалық, индустриялық және инновациялық мүмкіндіктерін көрсете отырып, қаланы Қытайдағы ең ірі порт, өнеркәсіптік және логистикалық орталықтардың бірі деп атады.
Гао Цзянь мырзаның айтуынша, Циндао мен Алматы облысы бір-бірін толықтыратын артықшылықтарға ие, бұлар – автокөлік жасау, жасыл энергетика, биомедицина, сауда және логистика салаларындағы бірлескен бастамалар. Осы орайда Циндао вице-мэрі аймақаралық өзара іс-қимылдың үш негізгі бағытын белгіледі.
– Біздің Алматы облысымен ынтымақтастығымыз бірнеше бағыттан тұрады. Бұл – өнеркәсіптік кооперацияны тереңдету, энергетикалық әріптестікті кеңейту, сауда мен логистиканы дамыту. Біз бірлескен өндірістер құрудың, заманауи технологияларды енгізудің және аймақтар арасындағы көлік дәліздерінің тиімділігін арттырудың үлкен әлеуетін көріп отырмыз. Мұндай қадам өзара сенімді нығайтып, аймақаралық ынтымақтастықты жаңа стратегиялық деңгейге көтеретініне сенімдімін, – деп атап өтті ол.
Өз сөзін қорытындылай келе, Циндао вице-мэрі Алматы облысымен ынтымақтастық екіжақты байланысты нығайта түсетінін атап өтті. Оның айтуынша, Қазақстан мен Қытай арасындағы достық – Еуразияның экономикалық картасын өзгертуге қабілетті стратегиялық жобалар құрылатын ұзақ мерзімді сенімнің берік іргетасы.
Форум барысында аймақтың инвестициялық әлеуеті жан-жақты таныстырылады. Жұмыс істеп тұрған және қалыптасу кезеңіндегі индустриялық аймақтар, өндіріс жүргізуге арналған жаңа аумақтар, ірі инфрақұрылымдық жобалар және терең өңдеу, агрокешен, жасыл энергетика, логистика және өнеркәсіп бағыттарындағы перспективалық бастамалар ұсынылды.
Форумда Алматы облысының басты бәсекелік артықшылықтарына мән берілді. Атап айтқанда, халықаралық көлік дәліздерінің торабында орналасқан стратегиялық маңызы, инженерлік және көлік инфрақұрылымының қарқынды дамуы, ірі өткізу нарығына қолжетімділігі және инвесторларды мемлекеттік қолдаудың дәйекті жүйесі алға тартылды.
Шарада қазақстандық және шетелдік компаниялар арасында бірқатар меморандум мен келісімдерге қол қойылды. Бұл құжаттар бірлескен инвестициялық жобаларды іске асыруға, заманауи технологияларды енгізуге, экспорттық өнімдер өндірісін кеңейтуге негіз қалайды.
«Alatau Investment Forum – 2025» халықаралық әріптестікті нығайтатын, инвестициялық ахуалды жаңа деңгейге шығаратын, экономикалық өсуге мүмкіндік ашатын маңызды драйвер болмақ.
Қуат ҚАЙРАНБАЕВ
