Кәсіби білімін жетік меңгеріп, таңдаған мамандығына адалдық танытып, сол салада табанды еңбек етіп жүрген жандар аз емес. Солардың бірі – Балқаш аудандық обаға қарсы күрес бөлімінің жоғары санатты лаборанты, көп жылғы тәжірибесі бар мейірбике Ақмарал Хәкімова. Ол халық денсаулығын қорғау жолында күн-түн демей тынымсыз еңбек етіп жүр.
Ақмарал Қаныбекқызы 1977 жылы Бақбақты ауылында дүниеге келген. 1984 жылы №1 Жамбыл атындағы орта мектептің табалдырығын аттап, 1994 жылы аталмыш білім ордасын ойдағыдай тәмамдайды. Мектеп қабырғасында жүріп-ақ медицина саласына қызығушылығы артқан жас түлек сол жылы Алматы қаласындағы медицина колледжіне оқуға түсіп, 1996 жылы медбике мамандығын алып шығады.
Еңбек жолын Балқаш аудандық санитариялық-эпидемиологиялық стансасында лаборант қызметінен бастайды. Ал 1998 жылдан бері аудандық обаға қарсы күрес бөліміне ауысып, күні бүгінге дейін осында табан аудармай еңбек етіп келеді. Бұл – үлкен төзімділік пен батылдықты, жоғары кәсіби дайындықты талап ететін сала.
Ақмарал Қаныбекқызы биологиялық зерттеулерге қатысып, залалсыздандыру шараларын атқарады, эпидемиологиялық бақылау жүргізуге белсене араласады. Сонымен қатар дәрігерлерге көмек көрсетіп, қауіпті індет ошақтарын дер кезінде анықтауға үлес қосуда.
Мейірбикенің күнделікті еңбегі – көзге көрінбейтін, бірақ аса маңызды қызмет. Жұмыс барысында санитарлық талаптарды қатаң сақтап, арнайы қорғаныш киімдері мен құралдарын қолдану – оның басты қағидаларының бірі. Қауіп-қатерге толы сәттерде де сабыр сақтап, кәсіби біліктілігін жоғалтпай, өз міндетін адал атқарып жүр.
Ұзақ жылғы адал еңбегі мен кәсіби шеберлігі еленбей қалған жоқ. 2025 жылы Ақмарал Қаныбекқызы Қазақстан Республикасы Денсаулық сақтау министрлігі Санитариялық-эпидемиологиялық бақылау комитетінің Құрмет грамотасымен марапатталды. Сонымен қатар «SENIN» денсаулық сақтау жүйесі жұмыскерлерінің кәсіптік одағының Алғыс хатына ие болды. Бұл марапаттар – оның маңдай термен келген еңбегінің айқын дәлелі.
Осындай жүрегі мейірімге толы, кәсібіне адал жандарды «көрінбейтін қаһармандар» деп атау орынды. Себебі олардың тынымсыз еңбегінің арқасында халықтың денсаулығы қорғалып, ел тыныштығы сақталуда.
Бақтығали ДӘУІТБАЙ
Балқаш ауданы
