Кеген ауданы Жылысай ауылында талай жылдан бергі тұрғындардың тілегі қабыл болып, Мәдениет үйі пайдалануға берілді. Қулық тауының етегінде орналасқан елдімекенде түрлі мәдени іс-шаралар бұған дейін мектептің шағын залында өтетін. Енді кең сахнада өнер көрсетуге мүмкіндік туды.
Екі қабатты ғимаратты жаңғырту жұмысын мердігер «Бауыр құрылыс компаниясы» жауапкершілігі шектеулі серіктестігі атқарды. Шараға арнайы қатысқан облыстық мәслихат төрағасы Қуат Байғожаев:
– Өткен күнмен салыстырып қарасақ, Жылысай ауылында су құбыры да тартылды, жол да жасалды. Міне, бүгін заманауи үлгідегі мәдениет ошағы ашылды. Халық денсаулығына үлкен мән беріліп, ауылдық емхана салынып жатыр. Осының бәрі Президентіміз Қасым-Жомарт Кемелұлының тапсырмасы аясында атқарылып жатқан игі істер, – дей келе, өңірдегі қоғамдық бастамаларға үн қосып, ауданның әлеуметтік-экономикалық дамуына атсалысып жүрген Жылысай ауылдық ақсақалдар алқасының төрағасы Болат Таубалдиевті «Қазақстан мәслихаттарына – 30 жыл» мерекелік медалімен марапаттаса, театр мен кино өнерінде биік белестерді бағындырып, қазақ сахнасының көкжиегін кеңейткені үшін актер Омар Қиқымовқа облыстық мәслихаттың Құрмет грамотасын табыстады.
Мәдениет үйінің ашылу салтанатында сөз алған Кеген ауданының әкімі Нұрбақыт Теңізбаев:
– Бұл нысан ауыл өмірінің рухани орталығы, өнер мен мәдениеттің ордасы, ұрпақ тәрбиесінің алтын ұясы болмақ, – деді.
Қоғам қайраткері Бексырға Данышпанов жиналған жұртшылықты қуанышымен құттықтап, «Өмірден түйгендерім» атты кітабын ауылдық кітапханаларға сыйға тартты.
«Бауыр құрылыс компаниясы» ЖШС өкілі Ғалымжан Мұхтарұлы жаңа ғимараттың символикалық кілтін Жылысай ауылдық Мәдениет үйінің директоры Қайрат Нарынбаевқа табыстады. Сондай-ақ салтанатты шарада сөз алған өнер зерттеушісі, журналист Сағатбек Медеубекұлы, актер Омар Қиқымов, ардагер-журналист Марат Тақабаев, сазгер Жақсылық Әбдіраманов, айтыскер ақын Нәсілхан Тоқтасынова ізгі тілектерін жеткізсе, ауыл тұрғыны Болат ақсақал ақ батасын берді.
Мәдениет үйінің лентасы қиылып, ақ жаулықты аналар шашу шашты. Бұдан соң жиналған көпшілік өнер ошағын аралап көрді. Екі қабатты зәулім ғимарат спортзалмен біріктіріле салынған. Мұнда домбыра мен қолөнер, шахмат пен дойбы үйірмелері, кітапхана, 140 орынды көрермен залы бар. Мәдениет үйінде 8 қызметкер еңбек етеді.
Салтанатты шараға келген жұртшылық ауыл өнерпаздарының кең сахна төрінде ұсынған концерттік бағдарламасын тамашалап, көтеріңкі көңіл-күйде тарқасты.
Дәурен ӘБУТӘЛІПОВ
Кеген ауданы
