Аспантау өңірінен түлеп ұшқан арқалы ақын, белгілі радиожурналист, ҚР Мәдениет саласының үздігі, Ә.Байжанбаев және Б.Құсанбек атындағы сыйлықтардың лауреаты Бақыт Жағыпарұлының 50 жасқа толған мерейтойы Алматыдағы Ұлттық кітапхананың үлкен залында салтанатпен аталып өтті. «Бақыт белесі» атты әдеби кешке белгілі қаламгерлер, өнер және мәдениет қайраткерлері, оқырман қауым қатысты.
Балалық шақтың балдәуренін бірге өткізген, арман биігіне қатарласа қанат қаққан «Жетісу» газетінің бас редакторы Жұматай Оспанұлы шараның модераторы болып, жүргізушілік тізгінді ұстады. Кеш шымылдығы «Сазген» ансамблінің орындауындағы күй сазымен ашылды. Қалықтаған қазақтың әдемі үні мерейтойдың шашуындай көпшілікті баурады. Т. Жүргенов атындағы өнер академиясының студенттері Бақыт өлеңдерін нақышына келтіре орындады. Сан алуан тақырыпты сөзбен сомдаған әсерлі жырлар көңілдерді тербеді.
Мінберге алғашқы болып көтерілген ҚР Парламенті Мәжілісінің депутаты, ақын Жанарбек Әшімжан Мәжіліс төрағасы Ерлан Қошановтың қаламгерге арнаған Құттықтауын оқыды. Онда Бақыт Жағыпарұлының шығармашылық еңбегіне, журналистік қызметіне лайықты бағасын берген. Қазақ радиосындағы қызметіне тоқталған. Айтыс өнерін жаңаша дамытуға үлес қосқанын да ерекшелеп көрсетеді. Тәуелсіздік иедеологиясын қалыптастыру жолындағы іс-әрекетіне ризашылығын білдіреді. Жанарбек Әшімжан сондай-ақ осы тектес мазмұнда жолданған ҚР Президентінің көмекшісі Арман Қырықбаевтың және Мемлекеттік қызмет істері агенттігінің төрағасы Дархан Жазықбайдың құттықтау хаттарын кеш иесіне табыс етті. Өз пікірін де ортаға салды.
– Бақыт тоқсаныншы жылдардағы қоғамдар ауысқан өтпелі кезеңнің сынағынан сүрінбей өтті. Өлеңге деген құштарлығы мен құрметін дәлелдей алды. Алға қойған мақсатынан айнымай, әлеуметтік қиындықтарға мойымай қаламын қолынан тастамады. Асқақ үміттерін ештеңеге айырбастамады. Оның жеңісі мен жемісіне, нәтижесіне енді, міне, өздеріңіз куә болып отырсыздар, – деді Жанарбек Әшімжан.
Әдеби кеште облыстық мәдениет, архивтер және құжаттама басқармасының басшысы Данияр Әлиев сөз сөйлеп, облыс әкімі Марат Сұлтанғазиевтің құттықтауын оқыды. Айтыскер ақын, Оралдан арнайы келіп дос қуанышына ортақтасқан Бауыржан Қалиолла кеше мен бүгінді бұзбай ұштастырған «алтынкөпірліктердің» бірі Бақыт Жағыпарұлы екенін мақтанышпен атады. Осы тектес жүрекжарды лебіздер аз болған жоқ. Бәрі ақынға әр қырынан баға беріп, бірін-бірі толықтырып жатты.
Мерейтойлық шараның ең басты ерекшелігі деп ақынның «Жанымның жазы» атты жаңа жинағының жарық көруін атар едік. Оған кейінгі уақытта жазылған өлеңдері кірген. Қаламгерлік көзқарастың кемелдене бастаған шағында туған шығармалардың жөні бөлек болатынын оқырмандар айтқызбай-ақ сезіп отырды. ҚР Мемлекеттік сыйлығының лауреаты, көрнекті ақын Нұрлан Оразалин, Қазақстан Жазушылар одағы басқармасы төрағасының орынбасары Қасымхан Бегмановтар жыр кітабының тұсауын кесті.
Мерейтойлық шара ақын сөзіне жазылған әдемі әндермен қорытындыланды.
Болат МӘЖИТ
