Мемлекет басшысының бастамасымен жүзеге асып жатқан «Таза Қазақстан» ауқымды республикалық экологиялық акциясы қыстың қыраулы күндерінде де жалғасуда. «AMANAT» партиясы Талғар аудандық филиалының өкілдері жуырда «Саябақтарымызды тазартайық!» атты шағын сенбілік ұйымдастырды. Акцияның дәстүрге айналған «Таза бейсенбіде» өтуі маңызды нышандық мәнге ие.
Акцияға қатысушылар қаланың ғана емес, бүкіл ауданның игілігі саналатын Жеңіс саябағына жиналды. Шараға партиялықтар ғана емес, Талғар агробизнес және менеджмент колледжінің студенттері де жұмылдырылды. Экологиялық іс-шараға қатысушылар екі күн жауған қалың қарды күреді. Ерекше ынта, жайдары көңіл-күймен жұмыс істеген олар әп-сәтте ескерткіштерге, монументтерге апаратын жолдарды, дүкендерге және саябаққа кіреберістегі іргелес аумақтарды тазартты.
Дәстүр бойынша экологиялық шараға жиналған жігерлі жастар мен коммуналдық қызмет жұмысшыларын, партия өкілдерін «AMANAT» партиясы аудандық филиалы төрағасының орынбасары Серік Дүмшібаев құттықтап, акцияны бейсенбі күндері өткізудің маңыздылығын атап өтті.
– Біз үшін акцияны сенбі күндері ғана емес, бейсенбі күндері де өткізу жақсы дәстүрге айналды. Президенттің бастамасына сүйене отырып, біз жастарды белсенді түрде қатыстыра алдық. Жыл мезгіліне қарамастан, акция қыста да жалғасын табады, өйткені ол тек қоқыстан ғана емес, қардан да тазарту шараларын көздейді. Акцияның мақсаты – экологиялық мәдениетті арттыру, табиғатқа ұқыпты қарауды қалыптастыру, сондай-ақ жастарды еңбексүйгіштікке баулу, – деді Серік Кеңесұлы.
Акцияға қатысушылар басқа саябақтарды, скверлерді, көпшілік ортақ пайдаланатын орындарды тазартуды көздеп, осындай іс-шараларды әр бейсенбі сайын өткізуді жоспарлады. Бұл акция – тазалықты сақтау ғана емес, еліміздің экологиялық болашағына бағытталған ұлттық жауапкершіліктің жарқын көрінісі болды.
Жоғары ұйымшылдық және белсенділікпен өткен тәрбиелік мәні зор шараға М.Бейсебаев атындағы Талғар агробизнес және менеджент колледжінің 50-ден аса студенті қатысты. Бұл аудан орталығындағы басқа да орта оқу орындары мен мектеп оқушылары үшін үлгі болары сөзсіз. «Көрші – көршіден ерте тұруды үйренеді» демекші, осылай жастар жақсы қасиеттерді бойларына сіңіреді.
Құтмағамбет ҚОНЫСБАЙ
Талғар ауданы
