Назарларыңызға ұсынып отырған мына фотосурет бұл күндері Желтоқсан көтерілісінің құнды жәдігеріне айналды. Оның авторы – Юрий Беккер. Енді осы сурет туралы аз-кем тоқталайық. Көтерілістен кейінгі жетінші айда қазақтың төрт жігітіне сот үкімі шығады. Қайрат Рысқұлбеков өлім жазасына кесіледі. Түгелбай Тәшенов пен Жамбылбек Тайжұмаев – 15 жылға, Қайыргелді Күзембаев 14 жылға бас бостандығынан айырылады. ҚазТАГ сот процесінен алынған хабар мен суретті редакцияларға жіберген.
«Хабарды оқығанда жанымыз түршікті. Бірақ сотта қасқайып тұрған жігіттерді көріп, сабыр еттік. «Саяси қырағылық» танытқан газеттер желтоқсаншыларды айыптаған материал берумен ғана шектелді. Ал біз оқырманға фотосуретті көрнекті форматпен ұсындық», – дейді сол кездегі Алматы облыстық «Жетісу» газетінің бас редакторы болған Мамадияр Жақып ағамыз өзінің естелігінде.
Бұл батыл әрекет ешкімді бейжай қалдырған жоқ. Компартиялық биліктің қанын басына шапшытты. Үкімді естігенде қазақ жастары тізелері дірілдеп, рухы жасып, жанын аман алып қалу үшін соттан сауға сұрап жылауы керек еді. Биліктің күткені де осы болатын. Ал Желтоқсан қаһармандары сын сағатта сыр бермеді. Жігіттердің қасқайып тұрған сесті кейіптері қызыл империя басшыларының зәресін ұшырды. Республика компартиясы орталық комитетінің бірінші хатшысы Г.Колбиннің: «Мынау Жақыпов дегенді идеологиялық жұмыстың маңына жолатпау керек», – деп бажылдағаны сондықтан еді. Содан бастап бас редактор біраз уақыт теперіш пен қудалауды бастан өткізді.
Желтоқсан қаһармандарының сол суреті қазір де көрген жанды тебірендірмей қоймайды. Аға буынның ізбасарлары, біздер, оны әрқашан мақтаныш тұтамыз, өзіміге өнеге етеміз. «Желтоқсан қаһармандары бейнеленген фотосуретті сол күні үнемі жариялап отырсақ жөн болар еді» депті Мамадияр аға бір сөзінде. Біз де осы ұсынысты құп көрдік.
Болат Батықұлы
