Қазақстан Республикасы Парламенті Мәжілісінің депутаты Қазыбек Иса Жамбыл ауданына жұмыс сапарымен келді. Халық қалаулысы Ұзынағаш ауылындағы бір ауысымда 250 келушіге арналған аудандық емханада денсаулық сақтау қызметкерлерімен кездесті.
Мәжіліс депутатын Жамбыл ауданы әкімінің міндетін атқарушы Ақниет Тұматаев пен медицина саласының ардагері, ауданның Құрметті азаматы Доғдыргүл Молдахалықова қарсы алып, жақында ғана пайдалануға берілген емхананың жұмысымен таныстырды. Заманауи емдеу орны Мемлекет басшысының өңірлерде алғашқы медициналық-санитарлық көмекті нығайту жөніндегі тапсырмасына сәйкес ашылған. Мұнда Жамбыл ауданының 200 мыңнан астам тұрғынына сапалы әрі қолжетімді қызмет көрсетілетін болады. Жаңа емхана заманауи медициналық құрал-жабдықтармен толық қамтылған, оның ішінде маммография, флюорография, рентген, эксперттік УДЗ аппараттары және басқа да диагностикалық құрылғылар бар. Онда күндізгі стационар қызмет көрсетеді.
Қазыбек Жарылқасынұлының сапары барысында аталған медициналық мекеменің материалдық-техникалық базасы, кадрлық қамтамасыз етілуі, сондай-ақ ауыл тұрғындарына көрсетілетін медициналық қызмет сапасын арттыру мәселелері кеңінен талқыланды. Депутат сала қызметкерлерінің ұсыныс-пікірін тыңдап, ауылдық жерлердегі денсаулық сақтау саласын дамыту, медициналық инфрақұрылымды нығайту және кадр мәселесін кезең-кезеңімен шешу қажеттігін атап өтті. Халықпен және сала мамандарымен осылай тікелей жүздесу – нақты мәселелерді анықтап, тиімді шешімдер қабылдаудың маңызды тетігі. Қызметкерлердің сапалы әрі нәтижелі жұмыс істеуі үшін қажетті жағдай барынша жасалған жаңа емханада депутат барлық тұрғынға жоғары дәрежеде медициналық көмек көрсетілетініне сенім білдірді.
Серік САТЫБАЛДИЕВ
Жамбыл ауданы
