Бүгінде интернет арқылы ақпарат алу, жаңа таныстық орнату, түрлі нəрселерді үйрену оңай. Бұл – заман талабына сай үлкен мүмкіндік. Əлеуметтік желі арқылы білім алады, достар табады, өз өнерін көрсетеді. Сонымен қатар түрлі байқауларға қатысып, өз қабілетін дамытып жүргендер де көп. Алайда виртуалды əлемнің пайдасымен бірге, жастарға тигізетін кері əсері де көбейіп келеді. Сондықтан қоғамда «Виртуалды əлем шынайы өмірден қашу ма?» деген сұрақ жиі қойылады.
Әлеуметтік желілерге тым көп уақыт бөлу шынайы өмірге кері əсерін тигізеді. Кейбір жастар кітап оқудан, тірі қарым-қатынастан алыстап, бар уақытын телефонға жұмсайды. Нəтижесінде бетпе-бет сөйлесу, өз ойын еркін айту қиындай түсуде. Кейбір жастар үшін шынайы ортада сөйлеу қорқыныш тудырып, ал виртуалды кеңістікте өзін еркін сезіну қалыпты жағдайға ұласты. Осылай виртуалды əлем кейбір адамдар үшін шынайы өмірден қашудың бір жолына айналуда.
Əлеуметтік желілердегі тағы бір мəселе – жалған ақпарат пен мінсіз өмірді көрсету. Көптеген блогер өз парақшаларында тек əдемі сəттерін бөліседі. Жастар əлеуметтік желідегі өмірді өз өмірімен салыстырып, оның соңы өзіне көңілі толмауға алып келуде. «Хабар» телеарнасының парақшасында мынадай ақпарат жарияланыпты: «Балалар мен жасөспірімдерде ең көп кездесетіні – көз аурулары, мүсіннің бұзылуы, сколиоз, тыныс алу жүйесінің аурулары. Сонымен қатар тірек-қимыл жүйесіне байланысты сырқаттар да жиі кездеседі».
Қазіргі заманда əлеуметтік желілерден толықтай бас тарту да дұрыс шешім емес. Себебі білім мен ақпараттың көп бөлігі интернет арқылы таралады. Онлайн сабақтар, пайдалы видеолар адамға өзін дамытуға көмектеседі. Білім алу – бүгінгі күннің басты талабы, ал виртуалды əлем бұл жолда үлкен мүмкіндік береді. Ең маңыздысы – виртуалды əлемді дұрыс пайдалану. Əр адам өз уақытына бақылау жасап, əлеуметтік желіні тек пайдасы үшін қолдануы керек. Демалысқа уақыт бөліп, шынайы өмірдегі достармен араласуды ұмытпау маңызды. Виртуалды əлем шынайы өмірдің орнын баспауы тиіс, ол тек көмекші құрал болуы керек.
Виртуалды əлем – шынайы өмірден қашу емес. Бірақ оны шектен тыс пайдалану адамды нақты өмірден алыстатуы мүмкін. Егер виртуалды кеңістік білім алуға, дамуға қызмет етпей, өмірдің басты бөлігіне айналса, онда қауіп төндіреді. Сондықтан виртуалды жəне шынайы өмір арасындағы тепе-теңдікті сақтау маңызды.
Жанбота ҚАДЫРМОЛДАНОВА,
№3 Қарғалы орта мектебінің
11-сынып оқушысы
Жамбыл ауданы
