Ұлы ақын, жыр алыбы Жамбыл Жабаевтың туғанына 180 жыл толуына орай 3660 әскери бөлімінде рухани-танымдық бағыттағы мазмұнды іс-шара ұйымдастырылды. Атаулы мерейтой аясында өткен бұл тағылымды шара әскери қызметшілердің рухани дүниетанымын байытып, ұлттық құндылықтарға деген құрметін арттыруды мақсат етті.
Іс-шара барысында әскери бөлімнің жеке құрамы Заречный ықшам ауданында орналасқан кітапханаға арнайы барып, Жамбыл Жабаевтың өмірі мен шығармашылығына арналған кітап көрмесін тамашалады. Көрмеге ақынның әр жылдары жарық көрген жыр жинақтары, айтыстары, естеліктері мен ғылыми-зерттеу еңбектері қойылды. Кітапхана қызметкерлері жыр алыбының өмір жолы, шығармашылық мұрасы, ел тағдырына арналған толғаулары жөнінде кеңінен мағлұмат беріп, ақын поэзиясының тәрбиелік мәніне тоқталды.
Әскери қызметшілер қазақ халқының ауыз әдебиетін жаңғыртып, халықтың мұң-мұқтажын жырына арқау еткен Жамбыл Жабаевтың ел тарихындағы ерекше орны туралы тың деректерге қанықты. Ақынның отансүйгіштікке, бірлік пен ынтымаққа үндейтін шығармалары бүгінгі ұрпақ үшін де маңызын жоймағаны атап өтілді.
Тағылымды шара одан әрі Қонаев қаласында орналасқан Жамбыл Жабаев ескерткішіне гүл шоқтарын қою рәсімімен жалғасты. Әскери қызметшілер ұлы тұлғаның рухына тағзым етіп, бір минут үнсіздікпен еске алды. Бұл сәт қатысушыларға терең әсер қалдырып, ұлттық рухты көтере түсті.
Аталған рухани-танымдық іс-шара жас сарбаздар мен әскери қызметшілерге патриоттық тәрбие берудің маңызды бір бөлігі ретінде өтті. Ұлы тұлғалардың өмірі мен еңбегін насихаттау арқылы жастардың ел тарихына, мәдени мұраға деген қызығушылығын арттыру көзделді.
Осындай тағылымды кездесулер мен мәдени шаралар алдағы уақытта да жалғасын тауып, әскери қызметшілердің рухани-мәдени дамуына оң ықпал етпек. Ұлы ақын Жамбыл Жабаевтың бай әдеби мұрасы – ұлттық рухтың мәңгілік қазынасы болып қала бермек.
Әбдіғалиева ӘлияТәңірбергенқызы
