Цифрлық технологиялардың дамуы адамдардың күнделікті өмірін жеңілдеткенімен, интернет-алаяқтықтың да жаңа түрлерін көбейтті. Алаяқтар жалған хабарландырулар, әлеуметтік желідегі парақшалар, телефон қоңыраулары және фишингтік сілтемелер арқылы азаматтардың жеке деректері мен ақшасын иемденуге тырысады.
Кей жағдайда олар өзін банк қызметкері немесе мемлекеттік орган өкілі ретінде таныстырып, шұғыл әрекет етуді талап етеді. Мұндай сәтте асығыс шешім қабылдамай, ақпаратты ресми арналар арқылы тексеру қажет. Банк картасының PIN-кодын, SMS арқылы келген растау кодтарын және құпиясөздерді ешкімге беруге болмайды.
Қаржылық пирамидалар да азаматтардың қаражатына қауіп төндіреді. Қысқа мерзімде жоғары табыс табуға уәде беретін ұсыныстарға сын көзбен қарап, ұйымның заңдылығын тексерген дұрыс. Интернетте сақ болу – жеке қаражатты қорғаудың маңызды шарты.
Айжарық КӨПТІЛЕУОВ