Алматы көпсалалы клиникалық ауруханасының гинекология бөлімінің базасында пренатальды диагностиканың инвазивті әдістері жүргізіледі. Алматы облыстық денсулық сақтау басқармасы мамандар Алматы облысында тәжірибеге бірегей әдісті енгізіп қана қоймай, оны өңір тұрғындары қолжетімді етті деп хабарлайды.
Пренатальды диагностика – ұрықта хромосомалық патология бар деген күдік болған кезде пренатальды кариотиптеуді жүргізу үшін ұрық материалын (хорионбиопсия, амниоцентез, кордоцентез) алу мақсатында ультрадыбыстық бақылаумен жүргізілетін жатырішілік операция.
Инвазивті зерттеу әдістері хромосомалық ауруларды, хромосомалық ауытқуларды, сондай-ақ моногендік ауруларды анықтау үшін ұрық материалын алу мақсатында генетик дәрігердің нұсқауы бойынша жүргізіледі.
«Дүниежүзілік денсаулық сақтау ұйымы мақұлдаған инвазивті диагностикаға жіберу үшін бірнеше талап қойылады. Ол үшін жүкті әйелдің жасы 35 жастан асқан болуы керек, жүктіліктің алғашқы апталарында кем дегенде екі рет өздігінен түсік болуы, отбасында баланың Даун синдромы болуы, бірнеше туа біткен ақаулар, хромосомалық патологияның жоғары қаупі анықталған инвазивті емес сынақтардың нәтижелері және биохимиялық немесе ультрадыбыстық маркерлер. Мұндай диагностиканың мерзімі тоғызыншы апта мен жиырма бірінші апта аралығында жасалады», – дейді гинеколог Риза Берікқызы.
Айта кетейік, инвазивті әдістер ұрықтың жасушалары мен тіндерін және провизорлық мүшелерді (хорион, плацента) алуға мүмкіндік береді. Материалды алу ультрадыбыстық бақылаумен трансабдоминальды түрде (іш қабырғасы арқылы) жүзеге асырылады.
