Жаңа оқу жылының басталуына аз уақыт қалды. Осыған орай аудан әкімі Нұрбақыт Теңізбаев Кеген ауылындағы күрделі жөндеу жұмысы жүргізіліп жатқан Өжек Жаңабаев атындағы орта мектебіне барып, құрылыс нысанын аралады.
1967 жылы пайдалануға берілген мектепке сейсмикалық күшейту және күрделі жөндеу жұмысы жүргізілуде. Құрылыс өткен жылы басталды, салынып жатқан үш қабатты ғимараттың ауданы 1903 шаршы метрді құрайды. Оқу орны 640 оқушыға лайықталған.
Аудандық білім басқармасының басшысы Мұратжан Қожанұлы бүгінгі таңда нысан 90 пайыз дайын екенін тілге тиек етті. Қажетті жабдықтар және жиһаздармен жабдықталған. Жобада асхана мен аумақты қосымша көгалдандыру қарастырылған. Сондай-ақ, бірқатар кабинеттерге интерактивті панельдер орнатылады.
Аудан әкімі Нұрбақыт Теңізбаев күні ертең жаңа оқу жылы басталатынын еске салып, мердігер мекеме өкілдеріне құрылыс жұмыстарын жеделдетуді және аяқтауды тапсырды. Материалдардың сапасына, мектептің заманауи жабдықтарына және жиһаздардың ыңғайлылығына ерекше назар аударды.
– Қазір тамыз айының ортасы, 1 қыркүйекке дейін қазандық дайын болуы керек. Мектеп жаңа оқу жылында ашылуы тиіс, – деді Нұрбақыт Молдахметұлы. Ол құрылыс нысанымен танысып шыққан соң, көркейту-көгалдандыру бағытында атқарылып жатқан жұмыстарды көріп, алдағы уақытта осы аймаққа төзімді басқа да ағаш көшеттерін әкеліп, гүлзарларды заманауи әдістермен суару технологиясын қолдану қажеттігін айтты.
Өжек Жаңабаев атындағы орта мектебінің күрделі жөндеу жұмысына 1 млрд 147 млн теңге бөлінген. Бас мердігер – «СП «NEFT» жауапкершілігі шектеулі серіктестігі. Мектеп жаңа оқу жылына дейін пайдалануға беріледі деп жоспарланып отыр.
Участок меңгерушісі Ерболат Ашыбаев:
– Мектептің күрделі жөндеу жұмысы былтырғы шілде айында басталды. Кесте бойынша кешігу жоқ, тамыз айында толық бітіреміз. Ішкі әрлеу жұмыстары аяқталуға жақын. Сыртқы жұмыстары қалды, – деді.
Сонымен, Өжек Жаңабаев атындағы орта мектептің құрылысы жаңа оқу жылына дейін бітеді деп күтілуде. Оқушылар қыркүйек айынан бастап жаңа мектепте білім алатын болады.
Дәурен Әбутәліпов,
Кеген ауданы
