Еңбекшіқазақ ауданы Есік қаласындағы дене шынықтыру және сауықтыру кешенінде бокстан «Алтын Адам» кубогінің ІІ халықаралық турнирі өтті. Былтыр ғана бастау алған бұл жарыстың жақсы жаңалығы көп.
Сүйінші хабарды турнирдің ашылу салтанатында жарысты ұйымдастырушы, бокстан халықаралық дәрежедегі IBA төрешісі, Алматы облысы төрешілер корпусінің төрағасы Манап Тілек жеткізді. «Қазақстан Республикасы Туризм және спорт министрлігі, спорт және дене шынықтыру істері комитеті «Алтын Адам» кубогін халықаралық дәрежедегі, Азия көлеміндегі «А» тобындағы турнир ретінде ресми бекітіп, қаулысын шығарып берді. Бұл – біз үшін үлкен жетістік. Алдағы уақытта турнир кең көлемде, биік дәрежеде өтіп, «Алтын Адам» кубогі еліміздің спорттағы бір брендіне айналатынына сенемін», – деген ол спортшыларға жеңіс тіледі. Алматы облысы дене шынықтыру және спортты дамыту орталығының директоры Қанат Серкенов соңғы уақытта мемлекет тарапынан спортқа бөлініп жатқан қолдаудың ерекше екенін айтты. Сонымен қатар турнирдің жоғары дәрежеде өтуіне атсалысып, демеушілік көмек көрсетіп жүрген кәсіпкер, меценат Махмед Гасанов пен Еңбекшіқазақ ауданының мәдениет, тілдерді дамыту, дене шынықтыру және спорт бөлімінің басшысы Дархан Ахметов те боксшыларға сәттілік тілеп, тамаша ойынның куәсі болды.
2007-2008 жылы туған жастар арасында өткен турнирге көршілес Қырғызстан мен Өзбекстанның және еліміздің түпкір-түпкірінен барлығы 109 спортшы қатысып, 13 түрлі салмақ дәрежесі бойынша мықтылар анықталды. 48, 51 және 57 кг салмақта бақ сынасқан боксшылар арасында қырғыз елінен келген жастар – К.Қалмұратов, Н.Ұланбеков, Н.Сұлтанов бабында екенін көрсетіп, бірінші орынды иеленді. 54 және 60 кг салмақта Шымкент қаласынан келген Б.Шаханұлы мен Б.Бахрам алтын алды. 63,5 кг және 71 кг салмақта рингке шыққан Алматы қаласының спортшылары Н.Амзебек пен Н.Шілдебай жеңіске жетті. Қызылорда облысынан келген мықтылардың ауыр салмақта аты алшысынан түсіп, 80 кг және 92+ кг салмақта А.Сәтбаев пен А.Азтай алтын олжалады. 86 кг салмақта жұдырықтасқан Өзбекстан елінен Н.Абдурасилов бірінші орынға ие болды. Ал Алматы облысының намысын 92, 75 және 67 кг салмақта қорғаған боксшылар А.Тілеужан, А.Қайрат пен Т.Алиев өзгелерден оқ бойы озық екенін көрсетті. Спортшылардың ойынын Алматы облысынан бас төреші С.Ахметов, Уганда мемлекетінен келген халықаралық дәрежедегі төреші Тузинде Поль, ұлттық дәрежедегі төрешілер Н.Әбдірайым, Ғ.Садықов және С.Нысановтар бағалады.
Құралай Мұратқызы,
Еңбекшіқазақ ауданы
