Халықаралық қарттар күні Тәңіртау етегіндегі ақ пейіл жұрттың асыға күтетін қасиетті мерекесіне айналған. Осынау орны бөлек қастерлі шараны ауданның үлкен-кішісі биыл да зор мереймен қарсы алды. Қазыналы қарттар мен ақ жаулықты аналарға лайықты құрмет көрсетіп, қуаныштарын бөлісті.
Дәстүрлі мерекені бірінші болып Қымбат Әжікеева мен Салтанат Кемекова басшылық жасайтын аудандық кітапхана мен балалар кітапханасының ұжымы бастады. Рухани қазына мекенінде ақ дастарқан жайып, береке мен бірліктің, татулық пен ізгіліктің ұйытқысы саналып жүрген қадірлі қариялардың бастарын қосты. Аудандық мешіттің наиб-имамы Көпірәлі Әлғожаның ақ батасымен ашылған мерекелік дастарқан басында салт-дәстүрге, әдет-ғұрыпқа, ұрпақ тәрбиесіне қатысты, қарттардың қоғамдағы алатын орны жайлы әсерлі әңгімелер кеңінен өрбіді. Ғасырлар бойы қалыптасқан ұлтымызға тән бата-тілектердің маңызы мен мәні төңірегінде ортақ ой тоғысты. Бүгінде қазыналы қарттардың қатарын түзеген Райымбек ауданының Құрметті азаматтары Қанат Ахметов пен Советбек Әубәкіров кітапхана қызметкерлерінің мерекеде мерейді тасытқан құрметі мен ыстық ықыласқа толы ақжарма тілектерін жеткізді. Заман ағымы, уақыт тынысы тудырып отырған көкейкесті мәселелер жөнінде ой-пікірлерімен бөлісіп, ұсыныстарын ортаға салды. Адам бойына рухани нәр беретін кітап оқуға құмарлық, жастар мен жасөспірімдердің әдебиетке деген көзқарасы туралы да келелі әңгімелер көп айтылды. Өз кезегінде Ләззат Күлипаева, Айтолқын Өтемеш, Майгүл Өтегенова сияқты кітапхана қызметкерлері де шақыртуларын қабыл алып, кездесуге келген, ортақ ой тоғыстырып, емен-жарқын әңгіменің көрігін қыздырған қарияларға ақ тілекке толы лебіздерін арнады. Кітапхана директоры Қымбат Әжікеева қарияларға зор денсаулық, ғибратты ғұмыр тілеп, ұжым атынан естелік кітаптар сыйлады.
Аудандық кітапханадан басталған мереке Б. Мұқай атындағы Мәдениет үйінде жалғасты. Салтанатты шараға әр ауылдан арнайы шақырылған қазыналы қарттар, ақ жаулықты аналар, ақсақалдар алқасы мен аналар кеңесінің төрағалары, қоғамдық ұйым өкілдері, ауыл әкімдері қатысты. Аудан әкімі Берік Дүйсенбаев қарттарды төл мерекесімен құттықтады.
– Құрметті қариялар! Сіздерді мейірім мен ізгіліктің, қайырымдылық пен даналықтың мерекесі – Қарттар күнімен шын жүректен құттықтаймын! Бүгінгі біз өмір сүріп отырған бақытты заманымыз өздеріңіздің қажырлы еңбектеріңіз, шүмектете төккен терлеріңіз, ақыл-парасаттарыңыз арқылы қаланғанын жақсы білеміз. Бұл үшін өздеріңізге алғысымыз шексіз. Қарттарымызды ардақтап, қай кезде де қамқорлық аясынан тыс қалдырмау – қастерлі міндетіміз. Сіздер аман болыңыздар! Сіздер барда уақыт алға тартқан қиындықтарды сезіне қоймайтынымыз анық, сеніміміз нық, – деген аудан әкімі өңірдің дамуына, әлеуетінің артып, мәдениетінің көтерілуіне үлес қосып келе жатқан бір топ қартқа облыс әкімінің бірінші орынбасары Нұрлан Әбдірахымның Алғыс хатын табыстады. Қарттардың тағы бір шоғыры аудан әкімінің Алғыс хатымен марапатталды. «Алтын қазына» әжелер ансамблі мен аудандық Мәдениет үйі өнерпаздарының концерті мерекенің ажарын аша түсті.
Жұмабек ТҰРДИЕВ
Райымбек ауданы
