Мұғалімдер күніне орай облыстық білім басқармасының ұйымдастыруымен өткен мерекелік шара екі бөлімнен тұрды. Қонаев қаласындағы орта мектеп гимназиясында облыстық білім басқармасының басшысы Салтанат Беспаева байқауларда жүлдегер атанған педагогтер мен білім беру мекемесінің үздік ұйымдарын марапаттады. Білім беру саласы қызметкерлерінің төл мерекесін атап өту әрі қарай Қонаев қалалық Мәдениет үйінде өз жалғасын тапты.
Мерекелік жиын басталмас бұрын көпшілік назарына ЛЭД экраннан облыстағы білім беру саласының бүгінгі ахуалы жайлы мағлұмат пен педагогтердің халықаралық аренадағы жетістіктері туралы бейнебаян ұсынылды. Балалар шығармашылық орталығы шәкірттерінің орындауындағы «Аяулы ұстаз» әнімен ашылған салтанатты шарада алғашқы сөз кезегі облыс әкімі Марат Сұлтанғазиевке берілді.
– «Ұстаздық еткен жалықпас, үйретуден балаға» деп ұлы Абай Құнанбайұлы айтпақшы, жас ұрпақтың санасына сіңіретін тәлім-тәрбие, үлгі-өнегелеріңіз өлшеусіз. Сіздер жастардың болашағын айқындайсыздар, бүгін еккен дәндеріңіз – ертеңгі жеңісті де жемісті күннің кепілі. Адам баласы ерте заманнан бері жаңаны үйреніп, ғылымды игеріп, білімді тоқумен келеді. Қай кезеңде болсын тәлім мен тәрбие беру – ең ұлы мұрат. Ендеше, Мұғалімдер күні – орны бөлек, дәрежесі биік, ең ұлық та ұлағатты мереке.
Қазіргі кезде білім берудің жаңа жүйесінің жасалуы, білім мазмұны мен әдіс-тәсілдерінің жаңаруы бәсекелестікке қабілеті мол, шығармашылық бағытта еңбектенетін, дарынымен ерекшеленетін азаматты тәрбиелеуді көздейді. Былтырғы оқу жылында ұстаздарымыз республикалық деңгейдегі кәсіби жарыстарда үздік нәтижелер көрсетті. Республикалық «Үздік авторлық бағдарлама» байқауында Әл-Фараби атындағы мамандандырылған лицейдің химия пәні мұғалімі Әбеу Нұргелді І орын, «Алтын Тұғыр» олимпиадасында Талғар ауданындағы А.Байтұрсынұлы атындағы мектеп-лицейінің ұстазы Мақпал Юсупова ІІ орын, «Педагогикалық идеялар фестивалі» конкурсында Ш. Смағұлов атындағы мамандандырылған физика-математика лицей-интернатының мұғалімі Талғат Сейдаз І орын иегері атанды. Өскемен қаласында өткен республикалық «Математикалық регата» олимпиадасында 24 команда арасынан облыстың командасы жүлделі ІІ орын иеленіп, мәртебемізді асқақтатты. Жыл сайын БҰҰ жанындағы Әлемдік даму ұйымы мемлекеттердегі тұрақты даму мақсаттары бойынша үздік жобаларды анықтап, марапаттайды. Биыл Алматы облысы аталған көрсеткіште «Сапалы білім» номинациясы бойынша қатысып, «Үздік инновациялық тәжірибе» сыйлығының лауреаты атанды. Бұл – үлкен жетістік, ортақ жеңісіміз деп есептеймін, – деген облыс басшысы жетістіктермен қатар, кемшіліктерге де тоқталып өтті.
– Мұғалімдер күні мерекесі халықаралық мәртебеге ие болғаны кездейсоқ емес. Мұғалім – болашақтың басты құрылысшысы және жасаушысы. Мемлекет басшысы тек білімді ұлт қана бәсекеге қабілетті бола алатынын бірнеше рет атап өтті. Сондықтан адами капиталды қалыптастыру және жетілдіру мемлекеттік саясаттың өзгермейтін басымдығы болып саналады. Бүгінде мемлекет әлемдік стандарттарға сәйкес келетін білім беру сапасының озық позицияларына шығу үшін бар күшін салуда. Жыл сайын қаржыландыру ұлғаюда, білім беру ұйымдарының желісі дамуда және жетілдірілуде.
Мұғалімнің мәртебесін арттыруға, оның жауапты еңбегіне лайықты ақы төлеуге көп көңіл бөлінеді. Қоғам мен адамзат алдындағы өлшеусіз еңбектеріңізді ескере отырып, сіздерге өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге толымды табыс тілеймін, – деп аяқтады өз сөзін облыс әкімі.
Сахна төрінде Марат Елеусізұлы облыстың «Жылдың үздік мұғалімі – 2024» байқауында бірінші орынды жеңіп алған Талғар ауданы Жаңалық ауылындағы І. Жансүгіров атындағы №37 мектептің информатика пәні мұғалімі Айнұр Жабаеваны құттықтап, автокөліктің кілтін табыс етті.
– Жыл сайын облыс әкімінің қолдауымен мұғалімдердің мәртебесін көтеруге және білім беру сапасын арттыруға бағытталған көптеген жұмыс істелуде. Осы орайда дәстүрлі «Жыл мұғалімі» байқауы өткізіледі. Оған қатысу әрбір ұстаздың арманы десем, артық айтқандық болмас. Биыл осы байқаудың жеңімпазы атанып отырмын. Бұл – мен үшін зор мәртебе, – деп ағынан жарылды автокөліктің иесі атанған облыстың үздік мұғалімі. Сол секілді облыстың «Жылдың үздік сынып жетекшісі – 2024» байқауында бірінші орынға ие болған Ұлдана Қартабаеваны және «Үздік балабақша – 2024», «Ең үздік кәсіптік білім беру ұйымы – 2024» байқауында жеңімпаз атанған ұжым басшыларын марапаттап, сертификат табыстады. Сонымен қатар өскелең ұрпақты білім нәрімен сусындату жолында еселі еңбек етіп жүрген ұлағатты ұстаздарға да облыс әкімінің Құрмет грамотасы мен Алғыс хатын табыс етті. Сонымен бірге облыстың білім саласының дамуына өз үлестерін қосып жүрген инвесторлар мен жоғары оқу орындарының ректорлары облыс әкімінің «Аймаққа еңбегі үшін» төсбелгісімен марапатталды. Сондай-ақ бірқатар педагог Оқу-ағарту министрлігінің «Еңбек ардагері» медалін және «Ыбырай Алтынсарин» төсбелгісін кеудесіне тақты.
Салтанатты жиын соңы концерттік бағдарламаға ұласты
Айжарық КӨПТІЛЕУОВ
Қонаев қаласы
