Қарасай ауданы – тұрғындар саны күн санап артып келе жатқан өңір. Сол себепті мұнда үшаусымды мектептер мәселесі жиі көтеріледі. Бұл өзекті жайтты шешу мақсатында «Жайлы мектеп» ұлттық жобасы аясында жаңа білім ошақтарын салу қолға алынған. Күні кеше ғана Елтай ауылдық округіне қарасты Көкөзек ауылында пайдалануға берілген мектеп солардың қатарында. Сәні мен сапасы келіскен білім шаңырағының ашылу салтанатына облыс әкімінің бірінші орынбасары Нұрлан Әбдірахым мен Қарасай ауданының әкімі Жасұлан Естенов қатысты.
«Samruk-Kazyna Construction» акционерлік қоғамының тапсырысы бойынша «BI Global» құрылыс компаниясы жүзеге асырған жобаның құны 8,8 млрд теңгені құрайды. 1500 оқушыға арналған үш қабатты ғимарат 3 гектар жерге орналасып, барлық қажеттілігі ескеріле отырып салынған бірегей мектеп болып саналады.
Білім шаңырағының ашылу салтанатында сөз сөйлеген Нұрлан Ерғалиұлы елімізде үшауысымды мектептер мәселесін шешу барысында атқарылып жатқан жұмыстар жайлы айта келіп, аймақтағы бұл бағытта қолға алынған ілкімді істерге тоқталып өтті. Көкөзек ауылында барлық керек-жарақтармен қамтамасыз етілген жайлы мектепте оқыған жастардың сапалы білім мен саналы тәрбие алып шығатынына сенім білдірген ол ұстаздар ұжымы мен оқушыларды, ата-аналарды қуанышымен құттықтады.
Сөзінің соңында Нұрлан Ерғалиұлы мектептің уақытылы әрі сапалы етіп салынуына үлес қосқан мердігер мекеменің бірнеше құрылысшысына облыс әкімі Марат Сұлтанғазиевтің Алғыс хатын табыс етті. Бұл жолы Айтбай Қалымбайұлы, Есімхан Қуанышұлы, Нұрлан Әнуарұлы сынды озаттар марапатқа ие болды.
Қалыптасқан дәстүр бойынша құрылысты жүргізген «BI Global» компаниясына қарасты «Промкомплект-Б» ЖШС-ның бас директоры Айтбай Әбенов мектеп директоры Жанна Шайхиеваға жаңа ғимараттың кілтін табыс етті. Осы орайда құрылыс компаниясының мектеп ұжымына құны 1 млн теңге болатын сертификатты табыс етуі тосынсый болғаны анық. Салтанатты шара барысында халқымыздың ежелгі дәстүрі бойынша қариядан бата сұралып, ақ жаулықты аналарымыз шашу шашты.
Осыдан кейін қонақтар жаңа ғимараттың ішін аралап, сынып бөлмелері мен спорт залын, асхана мен кітапхана жұмысымен танысты. Мектеп айналасы талапқа сай абаттандырылып, көгалдандырылса, ішкі жабдықталуы да жұртшылық көңілінен шықты. Мұнда физика, химия, биология пәндеріне арналған бөлмелер, үлкен жиынжай, жасөспірімдер мен ересек балаларға арналған екі спортзал, еңбек сабағына арналған бөлмелер, логопед, психолог мамандары жұмыс істейтін медицина кабинеті бар.
Қарасай аудандық білім бөлімінің меңгерушісі Әсел Еркімбаеваның айтуынша, жаңа мектепте қазірдің өзінде 1742 бала оқуға ниет білдірсе, 134 педагог білім беретін болады. Ал алдағы уақытта «Жайлы мектеп» жобасы бойынша Қаскелең қаласы мен Кемертоған және Алмалыбақ ауылдарында білім ғимараттары салынбақ. Осылайша, демографиялық өсімі өркендеп келе жатқан өңірде үшауысымды мектеп мәселесі өз шешімін табады деп күтілуде.
Қуат ҚАЙРАНБАЕВ
Қарасай ауданы
