Еңбекшіқазақ ауданы Шелек политехникалық колледжінің мәжіліс залында студенттер Халық қаһарманы, генерал-полковник Сәт Тоқпақбаев пен жазушы, Қазақстанның еңбек сіңірген қайраткері Сәуле Досжанмен кездесті.
Жастарды патриоттыққа тәрбиелеу, Отанға деген сүйіспеншілік сезімдерін арттыру мақсатында ұйымдастырылған басқосуға аты аталған қос тұлғамен бірге ҰҚК-нің ардагер қызметкері, полковник Қараби Мұхамбетқалиев пен запастағы капитан Әсет Алжанбай қатысты.
ҚР ҰҚК-нің төрағасы, ҚР Президенті күзет қызметінің бастығы, ҚР Республикалық гвардиясының қолбасшысы, ҚР Қорғаныс министрі, кейін Президент кеңесшісі, Президенттің жанындағы Сыбайлас жемқорлыққа қарсы күрес және мемлекеттік қызметшілердің қызметтік этиканы сақтау мәселелері жөніндегі комиссияның басшысы қызметтерін атқарған Сәт Бесімбайұлы жастарға өзінің ата-анасының қарапайым жұмысшы болғанын, алғашқы еңбек жолын Боралдай кірпіш зауытында бастап, бүгінгі ауыз толтырып айтатындай жоғары дәрежелі лауазымдарды жауапкершілікпен атқарғанын әңгімелеп берді. Халық қаһарманы жас ұрпаққа Отанның оттан да ыстық екенін өмірдегі нақты мысалдармен жеткізіп, студенттерді қызықтырған сауалдарға тұщымды жауап берді.
Бұдан кейін студенттер жазушы Сәуле Досжанның әдебиет туралы ойларын тебірене тыңдады. «Менің жалғыз серігім», «Үшінші есіктің құпиясы», «Жатқа туған бала», «Арман қала», «Үлкен үйдегі үрей», «Құдіретті қалам» сынды кітаптардың авторы Сәуле Мағазбекқызының туындылары орыс, жапон, француз, тағы басқа тілдерге аударылған. «Парасат» орденінің иегері.
«Алдыңғы жақсы артқы жасқа тәлім айтпаса, ел болғаның қайсы?!» деп қазақтың ұлы жазушысы Мұхтар Әуезов айтқандай, Сәуле Досжан жастарға ақыл-кеңесін айтып, оларға дұрыс жол сілтеді. Озық елдің білімін үйренуден жалықпай, халыққа қалтқысыз қызмет етуге шақырды.
Кездесу кешінде колледждің 3-курс студенті Эльнара Әбілова өзі жазған «Қыз монологын» оқып берді. Өнерлі жастар мың бұрала билеп, патриоттық әндерімен қонақтарды тәнті етті. Колледж директоры Қуат Дүйсебаев қос тұлғаға тәрбиелік мәні зор сөздері үшін алғыс айтып, сый-сияпат көрсетті. Ардагер Қараби Мұхамбетқалиев, аудандық ішкі істер бөлімінің басшысы Қайсар Асқарұлы, Журналистер одағының мүшесі Нұрлан Мұхаметқалиев, Ішкі істер органының ардагері Бақытжан Қырықбаевтар аталған кездесудің жастар үшін тәлімі мол болғанын айтып, кеш иелеріне ыстық ықыластарын білдірді. Танымал тұлғалар жаңа кітаптарын жастарға сыйға тартып, естелікке суретке түсті. Айтары бар қариялар болса, жастар да жақсылық шыңына шығуға ұмтылатыны анық.
Анарбек БЕРДІБАЕВ,
Қазақстан Журналистер одағының мүшесі
