ҚР Президенті Қасым-Жомарт Тоқаевтың бастамасымен елімізде мемлекеттік қызмет саласын жаңғыртуға бағытталған ауқымды реформалар жүзеге асырылуда. Бұл өзгерістердің басты мақсаты – мемлекеттік аппараттың тиімділігін арттырып, халыққа сапалы қызмет көрсету арқылы Әділетті Қазақстан құру.
Мемлекеттік қызмет жүйесін жетілдіру мақсатында ҚР Мемлекеттік қызмет істері агенттігі «Әділетті Қазақстан – адал азамат» қағидаты аясында мемлекеттік қызметшілердің әділдік, адалдық және мемлекетшілдік қасиеттерін нығайтуға ерекше назар аударуда. Мемлекеттік қызметке іріктеу және қабылдау жүйесіне енгізілген жаңашылдықтар арқылы ашықтық пен әділдік принциптері күшейтілді. Осы ретте жүзеге асып жатқан мемлекеттік қызметті реформалау жұмыстарының үш кейсімен бөлісе кеткеніміз жөн.
Алғашқысы – жаңғыртылған «Е-Qyzmet» порталын іске қосу арқылы мемлекеттік қызметке іріктеу және қабылдау рәсімдерін жеңілдету. Жыл басында бұл порталды пайдаланатын мекемелер саны 22 болса, қазіргі таңда екі есеге өскен. Жаңа жүйеде артықшылық өте көп. Мысалы, үміткерлер әлемнің кез келген нүктесінен онлайн түрде конкурстарға қатыса алады, қағаз құжаттар тапсырмай-ақ барлық деректер автоматты түрде жүктеледі, тестілеу кезеңінде заңнамалық актілер саны 9-дан 4-ке қысқартылған, ал ақпаратпен жұмыс істеу қабілеті арнайы бағаланатын болған. Сонымен бірге үміткерлердің жеке деректері анонимді түрде өңделеді, ал жеңімпаздарды анықтау автоматты түрде жүзеге асырылады.
Жаңа жүйе іске қосылғаннан бері мемлекеттік қызметке үміткерлер саны көбейген. Бұл мемлекеттік қызметке деген қызығушылықтың өскенін көрсетеді. Өз кезегінде Мемлекеттік қызмет істері агенттігі жаңа іріктеу жүйесін масштабтау жұмыстарын жалғастыруда. 2025 жылдың басынан қосымша – 24, ал екінші жартыжылдығынан 26 мемлекеттік органда үміткерлер Еqyzmet.gov.kz порталы арқылы іріктелетін болады. Сонымен қатар, алдағы уақытта эмоционалды интеллект пен рухани даму деңгейін бағалайтын тестілер енгізу жоспарлануда.
Екінші кейс – үздік түлектерге жаңа мүмкіндік беру. Мысалы, мемлекеттік грантпен оқу орындарын жоғары үлгеріммен (GPA 3,33 кем емес) аяқтаған жастар аудандық және ауылдық жерлердегі төменгі лауазымдарға конкурссыз тағайындалу мүмкіндігіне ие болды. Осы бағытта ҚР Мемлекеттік қызмет істері агенттігінің Алматы облысы бойынша департаменті еліміздің үздік университеттерімен (ҚазҰУ, SDU, AlmaU және басқалары) және аудандық әкімдіктермен бірлесе тиісті жұмыстарды жүргізуде. Бүгінде Алматы облысында осы бастама аясында 36 жас маман мемлекеттік қызметке қабылданып, халық игілігі жолында еңбек етуде.
Үшінші кейс – мемлекеттік қызметтегі басқарушы лауазымдарға талантты жастарды тарту мақсатында өңірлік кадрлық резервтерді қалыптастыру. Президенттік жастар кадр резервінің жалғасы ретінде 2024 жылы елімізде алғаш рет өңірлік кадрлық резервтері құрылды. Облыс бойынша 300-ге жуық үміткердің 26-сы резервке қабылданды. Олардың арасында ауылдық округ әкімдері, түрлі мемлекеттік орган мен квазимемлекеттік, жеке сектордың өкілдері бар. Резервке алынғандар екі жыл ішінде «Б» корпусындағы әкімшілік лауазымдарға тағайындалуы мүмкін.
Қазіргі уақытта мемлекеттік қызметке деген талап күшейді. Бұл өзгерістер – азаматтарға сапалы қызмет көрсету және халықтың сенімін арттыру бағытындағы маңызды қадамдар. Аталған агенттік осы реформаларды сапалы жүзеге асыру арқылы әділетті, адал және білікті мемлекеттік қызметшілер қатарын арттыруды көздейді. Мемлекеттік қызметке орналасқыңыз келсе Еqyzmet.gov.kz порталына кіріп, өз мүмкіндігіңізді байқап көріңіз!
Ділмұрат СУНАТИЛЛАЕВ,
ҚР Мемлекеттік қызмет істері агенттігі
Алматы облысы бойынша департаменті мемлекеттік
қызмет басқармасының басшысы
