Алматы облысының жас балуандары Қазақстан Республикасының Тәуелсіздігі күніне арналған республикалық турнирде үздік нәтиже көрсетті. Жарыс Қарасай ауданындағы «Nur-Aman» спорт кешенінде өтті. 2009-2010 жылдары туған жасөспірімдер өздерінің физикалық және техникалық-тактикалық дайындығын көрсетті.
Жарысқа елдің он өңірінен, атап айтқанда, Ақтөбе, Атырау, Түркістан, Қызылорда, Қарағанды, Жамбыл, Алматы, Ұлытау облыстарынан, Жетісу облысы мен Алматы қаласынан 10 команда, барлығы 290 спортшы қатысты.
Мамандардың айтуынша, қазақ күресінің танымалдылығы жылдан жылға артып келеді. Аталған турнир өскелең ұрпақты патриоттық рухқа тәрбиелеу, қатысушылардың спорттық тәжірибесін арттыру, әр өңірдегі балуандардың достық байланысын нығайту мақсатында өткізілді. «Бұл спорт түрі – біздің қанымызда бар. Ата-бабаларымыз қазақ күресінің әдіс-тәсілдерін ұлдарының бойына сіңіріп отырған. Ұлттық спорт түрін облыстың барлық аудандарында дамыту мақсатында түрлі деңгейдегі жарыстарды ұйымдастырып келеміз. Алдағы уақытта балаларды қамту аясын кеңейтуді жоспарлап отырмыз. Осындай спорттық іс-шаралардың арқасында біздің балуандарымыз республикалық және әлемдік аренаға шығады деп үміттенемін», – дейді қазақ ұлттық күресінің ардагері Қапар Раунов.
Қазақша күресте спортшының техника деңгейі мен дене дайындығы маңызды рөл атқарады. Дененің жоғарғы бөлігінен ұстауға, белбеу әдістеріне, аяқпен іліп қағуға, жамбас арқылы лақтыруға рұқсат етіледі.
«Бүгінгі жарыс қазақ ұлттық күресінің тек ересектер арасында ғана емес, жас спортшылар арасында да танымал екенін дәлелдейді. Қазақстан Республикасының Тәуелсіздігі күніне арналған турнир дәстүр бойынша 14-15 жастағы жасөспірімдерге арналған. Дәл осы жаста балуандардың күрес техникасының негізгі дағдылары қалыптасады. Алматы облысының намысын қорғап жүрген құрама негізінен Қарасай, Еңбекшіқазақ, Жамбыл, Алакөл және Кеген аудандарының өкілдерінен құралған», – деп атап өтті Алматы облысының қазақ күресі бойынша жасөспірімдер құрамасының аға жаттықтырушысы Қайрат Қуандықов.
Жарыс нәтижесінде 10 алтын медальдің 4-еуін Алматы облысының спорт мектептерінің тәрбиеленушілері жеңіп алды. Бақдәулет Кенжебек, Дінмұхамед Базарбай, Бекарыс Биғалиев және Ерасыл Сүйімбай облыс құрамасының қоржынына алтын медаль салды, одан басқа тағы 6 күміс және 5 қола медаль бар. Бұл жалпы командалық есепте бірінші орын алуымызға мүмкіндік берді.
Жамбыл облысы жеңіп алған медаль саны бойынша екінші орынға ие болды: 3 алтын, 1 күміс және 4 қола медаль. Жеңімпаздар қатарында Берік Есет, Заңғар Жақсылық және Айсұлтан Жалғасұлы бар. Сондай-ақ, Алматы қаласының екі спортшысы Мұхамеджан Қабылқожа мен Дінмұхамед Кеңесбек жоғары көрсеткіш көрсетті. Жетісу облысының өкілі Бекзат Қоғайбек те қарсыласының жауырынын жер иіскетті.
