Аралтөбе орта мектебінде Балқаш аудандық білім бөлімі мен бұқаралық-спорттық іс-шараларды өткізу орталығының ұйытқы болуымен КСРО-ның «Құрмет белгісі» және Қазақстан Республикасының «Құрмет» ордендерімен марапатталған, Қазақстан халықтары Ассамблеясының «Бірлік» медалінің иегері, ауданның Құрметті азаматы Бейсетай Дәуренбековті еске алуға арналған волейболдан жасөспірімдер арасында турнир өтті.
Спорттық шараның ашылу салтанатында сөз алған аудандық бұқаралық-спорттық іс-шараларды өткізу орталығының директоры Азамат Телтаев 12 баланың өмірін сақтап қалған бейбіт күннің батыры Бейсетай Дәуренбековті еске алып, ерен ерлігін ұрпаққа ұлықтау мақсатында ұйымдастырылып отырған турнир қатысушыларына сәттілік тіледі. Бұдан кейін Аралтөбе орта мектебінің оқушылары асыл азаматтың рухына арнаған өлеңдерін оқып, спортшыларға рухани күш-жігер сыйлайтын патриоттық әндерді орындады.
Аталған турнирде іріктеліп келген 7 команда жүлделі орындарды еншілеуге барын салды. Допты алақандарында ұршықша иірген жас волейболшылардың өнеріне жиналған жұрт тәнті болды. Ойын көрігін қыздырған спортшылар арасында «Аралтөбе» командасының көшін бастаған Бүркіт Темірболатұлы, Әлімжан Қалдыбек, «Береке» командасының ойыншылары – Аслан Манат, Әбілмансұр Бейбіт және тағы басқа спортшылар жанкүйерлердің ыстық ықыласына бөленді.
Тартысты өткен жарысты қорытындылай келгенде, Береке орта мектебінің командасы І орынды жеңіп алса, ақтық сайыста өнер көрсеткен Аралтөбе орта мектебінің ойыншылары ІІ орынды еншіледі. Ал жүлделі ІІІ орынды №1 Жамбыл атындағы орта мектептің командасы місе тұтса, №2 орта мектеп спортшылары Құрмет грамотасымен марапатталды. Жеңімпаз командаларға демеушілер тарапынан ақшалай сыйлықтар табысталды.
Жарысқа қатысқан жас спортшылар қасиетті Балқаш топырағынан жаралған асыл перзенттің ерен ерлігі жайында мол мағлұмат алып, рухани байлыққа бөленіп тарқасты. Шара соңында ас беріліп, марқұмның рухына Құран бағышталды.
Бақтығали ДӘУІТБАЕВ
Балқаш ауданы
