Мамыр айының басында Сарыбастау ауылының арқасүйер азаматтарына мектебіміз үшін қайырымдылық шарасына қатысуға ұсыныс білдірген едім. Азаматтар бірауыздан қолдап, игі істің шырағы жағылды. Қайырымдылық акциясы аясында шалғайдағы ауыл тұрғындары ортақ мүддеге ұйысып, осындағы Сарыбастау орта мектебінің есіктерін жаңартуға атсалысты. Жаңа есіктер орнатылып, балаларға ерекше әсер сыйлады.
Мектеп – тек білім ордасы ғана емес, балаларымызға жақсы тәлім-тәрбие беріп, жарқын болашаққа жол ашатын алтын қақпа. Осынау білім ошағының жаңарып, жарқырауына үлес қосқан азаматтарымыздың есімі ауыл тарихында алтын әріппен жазылары анық. Бастамаға демеушілік көрсеткен әрбір азамат – ауылымыздың нағыз жанашыры десек болады.
Ұрпақ келешегі жолында жұмыла атқарған әрбір ісіміз – берекеміздің бастауы, бірлігіміздің белгісі. Ортақ іске атсалысқан, жүрегі жылуға толы қайырымды жандарға алғысым шексіз. Қайырымдылықты парыз емес, жүрек қалауымен жасап, жанашырлығы мен жауапкершілігін танытқан жомарт жандарға облыстық газет арқылы шын жүректен алғысымды білдіргім келеді. Айта кетсем, біздің мектеп ұжымы келесі жылға «Алатау арайы» газетінің 40 данасына жазылды.
Жақсылық жасап жарысайық!
Сәуле ӘЛІМҚҰЛОВА,
Сарыбастау орта мектебінің директоры,
Жамбыл аудандық
мәслихатының депутаты
