Қонаев қаласында Жаңа жыл мерекесін тойлау жалғасуда. Бүгін қала әкімінің «Қош келдің, Жаңа жыл!» атты шыршасы өтті.
Оған 1-14 жас аралығындағы ерекше білім беруді қажет ететін балалар, мүгедектігі бар оқушылар, көпбалалы отбасылардың балалары мен түрлі жетістіктерге жеткен оқушылар қатысты.
Жаңа жыл кешінде «Ақшақарға айналған Күлше қыз» қойылымы көрсетіліп, түрлі би композициялары қойылды. Сонымен қатар жылдағы дәстүрге сай ортаға Аяз ата келіп, балалар тақпақ оқып, қала әкімінің сыйлығына ие болды. Жалпы бүгін 238 бала сыйлықпен қамтылса, оның 105-і салтанатты шараға шақырту алған. 1-4-сынып оқушыларына телефон мен тәттілер толы қорап берілсе, 5-сыныптан жоғары оқитындарға 50 мың теңге сертификат табысталды.
Шараның бірінші бөлімінде балаларды мерекемен қала әкімі Асхат Бердіханов құттықтады.
«Бүгін сіздермен кездескеніме қуаныштымын. Сіздердің мектеп қабырғасында сапалы білім алып, болашақта еліміздің адал азаматы болатындарыңызға сенімім мол! Әрқайсыңыз жеткен жетістік қаламызға үлкен абырой. Сіздерді жаңа жылмен құттықтай отырып, білімдеріңізді шыңдап, әрқашан үздіктер қатарынан орын алуларыңызды тілеймін. Жаңа жыл мерекесі құтты болсын!» – деді ол.
Ал екінші бөлімде баршаға тылсым көңіл-күй сыйлаған «Абракадабра» атты цирк шоуы қойылды.
Алдағы күндері қала әкімінің қатысуымен тағы бірнеше мерекелік кеш өтпек.
