Мемелекет басшысы Қасым-Жомарт Тоқаевтің «Ана тілі» газетіне берген «Мақсатым – экономиканы және егемендікті нығайту» атты көлемді сұхбатын зер сала оқып шықтым. Аталған сұхбатта Қасым-Жомарт Кемелұлы жылды қорытындылап, алдағы уақытта атқарылатын жұмыстың басым бағыттарына тоқталып, елдегі саяси және әлеуметтік өзгерістердің мәні жайлы тереңінен әңгіме қозғапты. Онда еліміздегі жетекші партия ретінде «AMANAT» партиясы атсалысқан «Таза Қазақстан» экологиялық акциясы мен атом энергетикасына қатысты референдум туралы да кеңінен айтылыпты. Аталған сұхбатта еліміздің ішкі, сыртқы саясаты, қоғамдағы оң өзгерістер мен жаңғырулар, саяси реформалар жайына тоқталыпты. Демек бұл қадамдардың барлығы еліміздің анағұрлым бәсекеге қабілетті мемлекет ретінде қалыптасуына орасан ықпал жасайтындығы анық. «Кез келген дәуірдің жақсы жағы да, көлеңкелі тұстары да бар. Біздің жаңа тарихымызда жарқын сәттер әлдеқайда көп болды. Бұл – ақиқат. Салыстырмалы түрде алғанда, қысқа мерзім ішінде мемлекеттігіміздің берік тұғыры қалыптасты, билік институттары құрылды, жаңа астанамыз бой көтерді, шекарамыз шегенделіп, заң жүзінде бекітілді. Көптеген елмен тиімді қарым-қатынас орнатылды, экономикаға шетелден инвестиция тартылды. Осы жетістіктің бәрін жоққа шығару дұрыс болмас еді. Біз әділетті мемлекет құрамыз десек, тарихқа да, оны жасауға атсалысқан азаматтарға да әділ қарауымыз керек», – деді Қазақстан Республикасының Президенті Қасым-Жомарт Тоқаев. Шынмен де біз дағдарыс дәуірінің сынағыннан өткен еліміз. Сондықтан да болашаққа нық сеніммен қарай аламыз. Онда ел ертеңіне жол нұсқалыпты. Президент сұхбатынан осындай ой түйдім.
Бағдат Рахимов,
«AMANAT» партиясы Еңбекшіқазақ аудандық филиялының төрағасы
