Еңбекшіқазақ ауданындағы Қайназар ауылының тұрғындары жергілікті кірпіш зауыттарының жұмысына шағымданып жүргеніне біраз жыл болды. Тұрғындар содан бері аллергия және басқа да қауіпті сырқаттарға шалдыға бастағанын айтқан еді. Енді міне, тұрғындардың талап-тілегі ескерілген күн де келіп жетті.
Алматы облыстық Мемлекеттік сәулет-құрылыс қадағалау басқармасы (бұдан әрі – МСҚҚБ) заңсыз салынған кірпіш зауытын тексеруге кірісті. Тексеру шаралары облыс бойынша жүргізіліп жатыр. Нәтижесінде Қарасай ауданында осындай зауыттардың бірі сүрілді.
МСҚҚБ мамандандырылған ауданаралық экономикалық сотқа Қайназар ауылындағы кірпіш зауытын сүру туралы кезекті талап арыз түсірген. Сот басқарманың талап арызын қанағаттандырып, “Қайнар” ЖШС-ны рұқсатсыз салған зауытын сүруге міндеттеген.
Соттың заңсыз кірпіш зауытын сүру туралы шешімінің орындалғанын тексермекке 11 мамырда МСҚҚБ-ның бөлім жетекшісі, Алматы облыстық Әділет департаменті Еңбекшіқазақ ауданаралық территориялық бөлімінің аға сот орындаушысы Сабина Қалиева, сот орындаушы Айгерім Тузилова мен БАҚ өкілдері Қайназар ауылына барды. Зауыт иесі Абдул Супиевтің айтуынша, кәсіпорын кірпіш шығару жұмыстарын тоқтатып, зауытты сүруге кіріскен.
Айта кетерлік жайт, бұл зауыт Қайназарда заңды бұза отырып, нақты айтқанда жоба-сметалық құжаттарын жасамай, авторлық және техникалық қадағалаусыз және уәкілетті органды құрылыс жұмыстарын бастағаны туралы ескертпей жұмыс істеп отырған жалғыз зауыт емес. МСҚҚБ хабарлауынша, бұл бағыттағы жұмыстар жалғасады және алдағы уақытта тағы бір зауыт сүрілмек.
