Кеген ауданында салауатты өмір салтын насихаттау мақсатында жыл сайын «Денсаулық фестивалі» өткізіледі. Қысқы спорт мерекесі биыл Тасашы ауылының тұмса табиғаты аясында жалғасын тапты. Аудан әкімдігінің қолдауымен ұйымдастырылған дәстүрлі шараға 500-ден астам аудан тұрғыны мен мемлекеттік қызметкер қатысты.
Кеген ауданының әкімі Нұрбақыт Теңізбаев, облыстық дене шынықтыру және спорт басқармасының басшысы Ерболат Сарабеков жиналған көпшілікті салауатты өмір салтын ұстанып, спортпен айналысуға шақырып, ізгі тілектерін жеткізді.
– Бүгінгі жарысқа қатысып жатқан әр ауылдық округ командаларына, мекемелерге сәттілік тілеймін! Облыстық дене шынықтыру және спорт басқармасы ауыл тұрғындарының салауатты өмір сүру салтын ұстануына ерекше көңіл бөліп келеді. Ауданда спорттық үйірмелердің ашылып жатқаны соның бір дәлелі, – дей келе, шаңғы жарысының шеберлеріне сәттілік тіледі. Спорттық шараның өтуіне атсалысқан ауыл әкімі Ерболат Төребаев, Қарқара ауылдық округінің Тасашы ауылының әкімі Ернұр Сабырбеков, ұстаздар Қымбат Қамбарбекова мен Гаухар Әуезханованы Алғыс хаттармен марапаттады.
Райымбек ауданының Құрметті азаматы, ардагер-ұстаз Жеңіс Әбілұлы қатысушыларға ақ батасын берді. Бас төреші Гайдар Мұқанқожаев жарыстың ережесімен таныстырды.
«Денсаулық фестивалінің» негізгі бәсекесі – шаңғы жарысы. Осы спорт түрімен айналысатын әуесқойлар Майтөбе тауының сағасында сынға түсті. Сайыс жас ерекшелігі бойынша ерлер мен әйелдер арасында өткізілді. Олар 1 км және 3 км қашықтықта сырғанады. Бұдан басқа арқан тарту, бұқа тартыс, қол күрес, тас көтеру сайыстары бойынша өзара мықтыны анықтады.
Бәсі биік бәсекеде жалпы командалық есепте І орынды Кеген ауылдық округінің командасы жеңіп алса, ІІ орынды аудандық аурухананың қызметкерлері иеленді, ал ІІІ орын Қарқара ауылдық округіне бұйырды.
Жарыс жеңімпаздары мен жүлдегерлерін аудан әкімінің орынбасары Кеңес Қабылбеков құттықтап, аудандық бұқаралық спорттық іс-шараларды өткізу орталығының дипломдары мен медальдарын табыстап, бағалы сыйлықтар тарту етті.
Дәурен ӘБУТӘЛІПОВ,
Кеген ауданы
