29 қаңтарға қараған түні Алматы облысы ТЖД-нің кезекші пультіне Еңбекшіқазақ ауданының “Бұғыты” таулы аймағында үш адамның жалға алынған Mitsubishi Pajero автокөлігімен Шарын шатқалынан демалыстан қайтып келе жатып, қар құрсауында қалғаны туралы хабарлама келіп түсті. Бұл туралы Алматы облысы ТЖД баспасөз қызметі хабарлады. Үш адам қардың ортасында қалып қойған, әйтсе де құтқарушылар олармен байланыс үзбеді.
Құтқару операциясын жүргізу үшін ТЖД-ның 9 қызметкері және 2 техникасы жіберілді.
Сағат таңғы 7:35-те құтқарушылар «Бұғыты» таулы аймағына келгенде сол жерде көліктің қарға тығылып, жүре алмай қалғаны анықталған. Құтқарушылардың үйлесімді жұмысының арқасында үш адам аман-есен құтқарып алынды. Олар медициналық көмекті қажет етпеді.
Құтқарылған азаматтар құтқарушыларға алғысын білдірді.
Олар жақын маңдағы Шелек ауылына жеткізілді.
Алматы облысы ТЖД азаматтарға сапарға шығар алдында, әсіресе таулы аймақтарда ауа райын ескеруді еске салады және барынша сақ болуға шақырады.
Ал төтенше жағдайға тап болғанда жедел көмек алу үшін 112 нөміріне қоңырау шалу керек.
