Нарынқол ауылының тұрғындары наурыз айы туысымен Ұлыстың ұлы мерекесіне көше-көше болып құрмет көрсетуді дәстүрге айналдырып келеді.
Қалыптасқан шара биыл да жарасымды жалғасын тапты. Қардың көбесі сөгіліп, жердің тоңы жібіп жатқан күндердің бірінде Ыдырыс Көшкінов атындағы көше тұрғындары қариясы басшы, жастары қосшы болып, ұлттық дәстүрге негізделген дастарқан жайды. Сары май, құрт, ірімшік, жеті шелпек, бауырсақ, басқа да дәмі тіл үйірген тәтті тағамдар, қысқы соғымның көктемге сақталған сүрісі, жеті түрлі дәмнен жасалған наурызкөже дастарқаннан орын алып, көпшіліктің көңілін көкке көтерді.
Көпірәлі Әлғожадай көше тұрғыны ақ батасын арнады. Жұмағали Сазабековтей қарт тұрғын ата-бабалар рухына Құран бағыштады. Дастарқан үстінде Наурыздың қадір-қасиеті, өзге айдан артықшылықтары туралы әңгіме тиегі ағытылды. Аудандық ақсақалдар алқасының төрағасы Бекболат Бірбаев, Тойғожа Достарбеков, Қанат Ахметов, Қожабек Әнәпияев сияқты қазыналы қарттар, Айнашқан Алжанбаева, Нұржан Солтанқұловадай ақ жаулықты аналар «Ұлыс оң, ақ мол болсын» деген ақжарма тілектерін арнады.
Жиналған көпшілік мерекелік шараның ұтымды ұйымдастырылуына ұйытқы болған Қуат Бекболов, Майнұр Мүңалбай, Наргиз Өтеубаева, Күлімхан Атагелдиева сияқты көше тұрғындарына ризашылығын білдірді. Дастарқан басында көнеден жаңаға жеткен халық әндері шырқалды. Қариялар мен жастар арқан тартудан күш сынасты. Ұлыстың ұлы күні құрметіне көшеде өткізілген Наурыз тойы сән-салтанатымен мерекенің мерейін асырды.
Жұмабек ТҰРДИЕВ
Райымбек ауданы
