Бокстан Болгарияның София қаласында өткен «Странджа» халықаралық турнирінде ерекше көзге түскен боксшылардың бірі – Ертуған Зейнуллинов. 63,5 кг салмақ дәрежесінде сынға түскен жерлесіміз барлық қарсыласынан басым түсіп, бас жүлдені олжалады. Осы жарыстың куәсі болған білікті бапкерлерден бастап, көгілдір экранға көз тіккен көрермендер былғары қолғап шеберінің өнерін жоғары бағалады.
Халықаралық додада қазақстандық боксшылар 5 алтын, 9 күміс, 4 қола еншілеп, жалпы есепте бірінші орынға ие болды. Ұлттық құрама сапында өнер көрсеткен Алматы облысының үміті Ертуған Зейнуллинов те жоғары дәрежеде жұдырықтасып, ел құрамасының топ жаруына өз үлесін қосты.
Болгария төріндегі финал 63,5 келідегі Ертуған Зейнуллинов мен Мұхаммедсабыр Базарбайұлының арасында өтті. Бұған дейін Қазақстан чемпионатының жартылай финалы мен Париж Олимпиадасының іріктеу спаррингінде есе жіберген Ертуған осы жолы реванш жасап қана қоймай, чемпион атанды. Қос боксшы арасындағы айқас Ертуғанның жеңісімен аяқталып, Базарбайұлы күміс жүлдегер атанды.
Алтыннан алқа таққан оғыланымыздың өмір жолына аздап үңілер болсақ, Е.Зейнуллинов Алматыдағы Спорт және туризм академиясына оқуға түсіп, ол жерде білікті бапкер Қайрат Кәрменовтен тәлім алды. Ол осыған дейін бірқатар халықаралық жарыста топ жарды. Былтыр желтоқсан айында өткен ел біріншілігінде Алматы облысының атынан сынға түскен Ертуған Зейнуллинов 63,5 келіге дейінгі салмақ дәрежесінде Қазақстан чемпионы атанды. Былғары қолғап шеберіміз әлі алда өтетін талай әлемдік жарыстарда жасындай жарқылдайды деп үміттенеміз.
Ерзат АСЫЛ
Қонаев қаласы
