Қонаев қаласында «Наурызнама» онкүндігінің алғашқы Көрісу күні аталып өтті. Көрісу күнін мерекелеу Жамбыл көшесінің бойындағы аллеяда орнатылған шаңырақтың астындағы алаңқайдан бастау алды. Жыл басын тойлауға жиналған жұртшылық бірін-бірі қыстан аман-есен шығуымен, келіп жеткен Ұлыстың ұлы күнімен құттықтап, құшақтасып көрісті. Қонаев қаласының тұрғыны Жақабай Шыныбаев ақсақал ақ батасын берді. Мерекелік шарада бас қосқан тұрғындар облыстың өнер ұжымдары әзірлеген концерттік бағдарламаны тамашалады. Мерекелік шара одан әрі Халыққа қызмет көрсету орталығы мен қаладағы ірі сауда орындарында жалғасын тапты.
– Былтыр еліміз бойынша Наурыз мейрамын тойлаудың жаңа тұжырымдамасы бекітіліп, әр күні белгілі бір тақырыпқа арналған «Наурызнама» онкүндігі жарияланды. Жаңаша форматта тойланатын Наурыз мейрамы Көрісу күнінен басталады. Көрісуден бастап облыс көлемінде түрлі деңгейдегі 368 іс-шара ұйымдастыру жоспарланған. Наурыз – қазақтың ғана емес, барша түркі жұрты мен парсы халықтары тойлайтын мереке. Осы орайда облысты мекендейтін көптеген этнос өкілдері «Наурызнама» онкүндігінің жоғары деңгейде өтуіне белсене атсалысатынын атап өткен жөн, – деді облыстық мәдениет, архивтер және құжаттама басқармасының басшысы Данияр Әлиев.
– Қонаев қаласында Наурыз мейрамын тойлау басталды. Көрісу күні қайта жаңғырып, жалпыұлттық сипат ала бастады. Осы ғұрпымыз татулығы жарасқан еліміздің ырысты ынтымағын арттырып, берекелі бірлігін нығайтатыны сөзсіз. Көрісу күні құтты болсын! – деп ағынан жарылды «Нұр-Қамқор» әжелер ансамблінің жетекшісі Алтынкүл Амантаева.
Қонаевта бастау алған онкүндік аясында мектептер мен балабақшалар ұжымы бір-біріне қонаққа барып, көрісіп, арқа-жарқа болды.
Айжарық КӨПТІЛЕУОВ
Қонаев қаласы
