«Digital Keruen» жобасы Кеген ауданында жалғасты. Бұл жоба жастардың IT және цифрлық технологиялар саласына қызығушылығын арттырып, заманауи мүмкіндіктерді кәсіпкерлік пен инновациялық жобаларға тартуға бағытталған. Жоба облыстық жастар саясаты мәселелері жөніндегі басқармасы, жастар ресурстық орталығы, дене тәрбиесі, спорт, алғашқы әскери дайындығы және қосымша білім берудің ғылыми-тәжірибелік орталығы, «Astana Hub» халықаралық технопаркі «Alatau Hub» филиалының ұйымдастыруымен жүзеге асырылуда.
Жобаны түсіндіру мақсатында Кеген ауылындағы Кеңес Нұрпейісұлы атындағы мектеп-лицейінің акт залында жоғары сынып оқушыларымен кездесу өтті. Оған Astana Hub» халықаралық технопаркінің «Alatau Hub» аймақтық менеджері, «Digital Dala» IT-медиа қауымдастығының ұйымдастырушысы, бірнеше стартап жобалардың негізін қалаушы Нұрақын Бексұлтан, «Arbuz.kz» компаниясының Android бағдарламашысы, «Digital Dala» қауымдастығында автор, контент жасаушы Сұлтан Сүлейменов, «Quran_Academy» білім беру орталығының негізін қалаушы, журналист Абдрахман Серікұлы, «University Quest» компаниясының графикалық дизайнері, «Focus: Graphic Design» курсының авторы Нәсіп Нұрмұхан қатысып, өз тәжірибелерімен бөлісті. IT саласындағы негізгі трендтер мен мүмкіндіктер туралы айтты. Желілік технологиялардың дамуы, олардың цифрлық трансформациядағы маңызы және деректерді талдаудың негізгі құралдары туралы пайдалы ақпараттарды ортаға салды.
Қатысушылар Cisco шешімдерінің компаниялардың инфрақұрылымын оңтайландыруға қалай көмектесетінін, ал бизнес-талдау әдістері стратегиялық шешімдерді қабылдауда қандай рөл атқаратынын білді.
Нұрақын Бексұлтан, «Astana Hub» халықаралық технопаркінің «Alatau Hub» аймақтық жетекшісі:
– Мақсатымыз – жастарды «Astana Hub» және «Alatau Hub» ұсынатын мүмкіндіктермен таныстыру. ІТ саласында қандай жаңалықтар болып жатыр, қалай дамып жатыр, қай мамандықтарды оқуға болады осы жайында хабардар ету. Осы орайда тегін курстар өткізілуде. Оны үйден онлайн оқыса да болады. «Digital Keruen» – 14-пен 35 жас аралығындағы жастарға арналған үлкен жоба. Қызығушылық танытқан әрбір жасқа қолдау білдіруге дайынбыз, – деді .
Айта кету керек, «Alatau Hub» – стартаптар мен инновациялық шешімдердің орталығы, өңірдегі жетекші IT-хабтың бірегей экожүйесі. Мұнда бағдарламалау, робототехника және басқа да озық технологияларды үйренуге барлық жағдай жасалған. «Alatau Hub»-та өз дағдыларын дамытуға, жеке жобалармен жұмыс істеуге мүмкіндік беретін технологиялық клубтар жұмыс істейді. Онда инновациялық стартаптармен танысып, жастар қабілетін шыңдауда қолдау мен мүмкіндіктер ұсынылады.
Дәурен ӘБУТӘЛІПОВ,
Кеген ауданы
