Жылдам дайындалатын кеспе өндіруде көшбасшы саналатын «Маревен Фуд Тянь-Шань» сауда-өндірістік компаниясы ел нарығына қадам басуының он жылдығына орай облыс дәрігерлеріне В кластағы 10 «Жедел жәрдем» көлігін сыйға тартты. Автомобиль алғашқы реанимациялық іс-қимыл мен дәрігерлік көмек көрсетуге, науқастарды емдеу мекемесіне жайлы тасымалдауға қажетті заттармен жабдықталған.
Автомобиль кілтін табыстау шарасы Ынтымақ ауылындағы дәрігерлік амбулатория аумағында өтті. Оған облыстық денсаулық сақтау басқармасының басшысы Ержан Сүлейменов пен «Маревен Фуд Тянь-Шань» компаниясының бас директоры Сергей Попов, медицина саласының өкілдері қатысты.
Шара барысында сөз алған басқарма басшысы Ержан Әбілқасымұлы кәсіпорын аймақтың әлеуметтік-экономикалық дамуына зор үлес қосып келе жатқанын атап өтті.
– «Маревен Фуд Тянь-Шань» компаниясы ел игілігіне қызмет етіп келеді. Олар өткен жылы да Алатау қаласының әкімдігіне «Жедел жәрдем» көліктерін сыйға тартқан еді. Биыл атаулы күнге орай сол игі дәстүрді жалғап отыр. Бұл өзге кәсіпорындар үлгі алатын керемет бастама. Мен аймақтағы денсаулық сақтау қызметкерлері атынан компания басшылығына айырықша алғыс айтамын, – деді басқарма басшысы Ержан Сүлейменов.
Келесі қадамда «Маревен Фуд Тянь-Шань» сауда-өндірістік компаниясының ел экомикасы үшін еңбек ете бастағанының он жылдығына орай БАҚ өкілдеріне арналған баспасөз конференциясы ұйымдастырылды. «Роллтон», «Big Bon» және «Петра» брендтерімен жылдам дайындалатын макарон өнімдерін өндіретін кәсіпорын 4,5 гектар аумақты алып жатыр. Бүгінде аталған кәсіпорын еліміздегі ең үздік азық-түлік өндірушілерінің бірі саналады.
– Біздің компания 10 жылдан бері нақты стратегиялық жоспар негізінде үздіксіз дамып келеді. Қазір өнімдеріміздің 50 пайызға жуығын шетелдік нарыққа шығарамыз. Біздің өнімдер әлемдік нарық талабына сай болғандықтан сұраныс күннен-күнге артып келеді. Компания осы аралықта өндірісін өркендетуге 35 миллиард теңгеден астам инвестиция салды. Алда тағы жаңа өндірістік желілер ашуға 21 миллиард теңге инвестиция салуды жоспарлап отыр. Он жылда біздің компанияның тауар айналымы 8 есеге жуық артты. Бізде өнімнің 120-дан астам түрі бар. Өткен жылы компания нарыққа 12 жаңа өнім шығарды. Олардың ішінде тез дайындалатын кеспе мен макарон өнімдерінен өзге, жеміс шырындары мен энергетикалық сусындар, сондай-ақ дәмдеуіштер бар, – деді кәсіпорын басшысы Сергей Попов.
Кәсіпорын өкілдерінің сөзінше, компанияда 670-тен астам қызметкер жұмыс істейді, олардың 95 пайызы жақын маңдағы елдімекендердің тұрғындары. Аталған компания облыстағы халықтың әлеуметтік осал тобына үнемі қайырымдылық жасап келеді.
Шара соңында қатысушылар «Маревен Фуд Тянь-Шань» ЖШС-нің өндірістік желісін аралады. Аталған кәсіпорынға Германия, Швейцария, Испания, Жапонияның жаңа заманауи желілері орнатылған. Бүгінде 7 желі кезең-кезеңімен іске қосылған. Өнім өндіруде көбінде отандық шикізатқа басымдық беріледі. Барлық өндіріс барысы қатаң қадағаланып, өнімдер түрлі зертханалық тексерістен өтіп, қоймаға жөнелтіледі. Заманауи өндіріс желісінде білікті мамандар қызмет етеді. Биік белесті бағындырған кәсіпорынның алар асуына сеніп қайттық. Алда «Қазақстанда жасалған» өнімдердің әлем нарығынан ойып орын алары сөзсіз.
Ерзат АСЫЛ
