Мен көпжылдық тарихы бар «Талғар-су» кәсіпорнында тракторшы-экскаваторшы болып істеймін. Жастық шағымнан бастап, бірінші санатты маман ретінде қалыптасу кезеңімнің бәрі осы мекемеде өтті. Сондықтан да болар қазір мені бұл ұжымдағы үлкен-кішінің бәрі біледі, ұзақ жылғы еңбегімді, тәжірибемді бағалап, құрметтейді.
Тракторшы мамандығына 10 жасымда қызықтым. Мектепте «Механизаторлық іс» пәнін оқыған кезде алғаш рет трактордың руліне отырдым. Кейін шағын жүк көлігінен бастап, «КамАЗ»-ға дейінгі ауыр техниканың барлық түрін жүргізуді үйрендім. Бұл менің болашақ мамандығымды таңдауыма ықпал етті. Мектепті бітірмей тұрып-ақ болашақта механизатор боламын деп шештім. Ата-анам да қарсы болған жоқ, «өзің шынымен қаласаң болды» деді.
Қазіргі кезде мен экскаваторшы-машиниспін. Бүгінгі күні бұл сұранысқа ие кәсіп. Оған бұл істі жақсы меңгерген тәжірибелі мамандардың аздығы себеп болуда.
Бір кездері мен Алматы қаласында қоғамдық көлік саласында жұмыс істеп, шағын автобус жүргіздім, бірақ оған көңілім толмады. Сөйтіп, ауыр техникамен жұмыс істеуге кірістім. Біздің кәсіпорын жақында өз қаражатына шетелдік «CASE» фирмасының 2 жаңа тракторын сатып алды. Мен оны қалай жүргізу қажеттігін лезде меңгеріп алдым. Экскаваторшы-машинист қандай жұмыспен айналысады десеңіз, оның міндетіне топырақпен жұмыс істеу, үйінділер тұрғызу, арықтарды, қазаншұңқырларды, іргетас астындағы алаңдарды, орларды қазу, сондай-ақ қыста аулаларды қоқыс пен қардан тазарту кіреді. Ұзақ жылдық тәжірибемнің арқасында мен бұл жұмысты нәтижелі атқарып келемін. Мекеме басшылығы еңбегімді жоғары бағалап, бірнеше рет Алғыс хатпен марапаттады, ақшалай сыйлық та табыстады.
Еңбектің әділ бағалануы адамды одан да жақсы жұмыс істеуге құлшындыра түседі. Сеніп тапсырылған техника тез сынып, тоқтап қалмауы үшін оны күтіп ұстап, уақытылы тексеріп, майлап, техникалық қызмет көрсетіп тұруға ынталандырады. Өйткені ол – сенің күнделікті жұмыс істеп, табыс тауып, бала-шағаңды асырап отырған құрал. Жұмыстан бос кезімде жастарға техниканы қалай басқарып, жөндеу қажеттігін үйретемін. Өзімнің де бес балам бар, олардың әке жолын қуып механизатор болғанын, ең бастысы еңбексүйгіш, өз Отанының лайықты азаматтары болып өскенін қалаймын.
Ерболат АХМЕТОВ, «Талғар-су» кәсіпорнының экскаваторшы-машинисі
Талғар қаласы
