Қазақстан Республикасының Мемлекеттік қызмет істері агенттігінің Алматы облысы бойынша департаментінің басшысы Нұрсұлтан Сейдалиев Балқаш ауданына арнайы іссапармен келді.
Құрметті қонақ сапарын Бақанас ауылындағы жастарға қызмет көрсету орталығынан бастады. Онда аудан жастарымен кездесіп, емен-жарқын сұхбаттасқан Нұрсұлтан Ақылбекұлы Президенттік кадр резервіне іріктеу кезеңіне қатысу және өткізілу тәртібі бойынша түсіндірме жұмыс жүргізіп, мемлекеттік қызмет сапасын арттыру мен әдеп стандарттарын нығайту мәселесі жайында кеңінен әңгіме өрбітті. Жастардың сұрақтарына жауап беріп, ашық пікір алмасты.
Мұнан соң осы мәселе бойынша кездесу жиындар өңір басшысы Азат Құтпанбетовтің қатысуымен аудан әкімдігінің мәжіліс залында және «АМАNAТ» партиясы Балқаш аудандық филиалының ғимаратында жалғасын тапты. Сонымен қатар департамент басшысы аудан орталығындағы халыққа арналған цифрлық кеңсеге барып, күн тәртібіндегі негізгі мәселе – Президенттік кадр резервіне іріктеу кезеңіне қатысу үшін талап етілетін құжаттар және кандидаттарға қойылатын талаптар жөнінде мол мағұлмат берді. Мемлекеттік қызмет істері агенттігі белгіленген құзыреттілік шеңберінде қызмет көрсетіп, оның сапасын бағалау мен бақылауды жүзеге асыратын айтты.
Мемлекеттік қызмет жүйесінің тиімділігі, ең алдымен кадрлардың тұрақтылығы және кәсіби дайындығымен өлшенеді. Ал қызмет көрсетудің сапасы азаматтардың құқығын қорғауды қамтамасыз етеді. Әрбір қызмет алушының құқығын қорғау – мемлекеттік қызметшінің тікелей міндеті болып саналады. Мемлекеттік қызметші үшін халыққа қызмет – мінсіз міндет.
Бақтығали ДӘУІТБАЕВ
Балқаш ауданы
