Жамбыл аудандық Мәдениет үйінде «Құқықтық көмек» жобасы аясында мобильді қоғамдық қабылдау өтті. Онда әртүрлі сұрақпен келген 40-тан астам тұрғын мәселе көтеріп, жоғары жаққа тілектерін білдірді. Негізінен жол жөндеу, ауызсу тапшылығы, көше жарығы, тұрғын үй, мектеп, балалар алаңы және спорт кешеніне қатысты өтініштер айтылды.
Тұрғындар қаңғыбас иттер, қоқыс контейнерлері, жұмысқа орналасу, субсидия, грант бөлу, жер телімдері мен мемлекеттік бағдарламаларға қатысты сауалдарын қойды. Қабылдауда ерекше назар аудартқан өтініштің бірі – Беріктас ауылында спорт кешенін салу туралы болды. Аталған ауыл тұрғыны Жанбол Өмірзақов бұл мәселеге «Қазақстан халқына» қоғамдық әлеуметтік қоры арқылы қолдау көрсетуді сұрады. «Мемлекет басшысы Қасым-Жомарт Тоқаевтың бастамасымен құрылған «Қазақстан халқына» қоры арқылы Беріктас ауылында спорт кешенін салуға қолдау көрсетулеріңізді сұраймын. Бұл мақсатқа Жамбыл көшесінде 1 гектар жер телімі дайын. Ол жер қазір ауыл әкімдігінің теңгерімінде тұр. Ауыл жастары мен тұрғындары үшін бұқаралық спортпен айналысуға жағдай жасау – аса маңызды», – деді ол.
Бұдан бөлек, тұрғындар апатты үйлер, үшауысымды мектептер жайы, Мәдениет үйі мен балалар алаңын салу, ескірген электр желілерін ауыстыру, жұмыссыздық, тұрғын үй кезегі және әлеуметтік қолдау төңірегінде мәселе көтерді. Б.Қыдырбекұлы ауылының тұрғыны Жадыра Жаңабаева Ұзынағаш-Күрті автожолының елдімекен жанынан өтер тұсына жарық шамдарын орнату қажеттігін, қарғалылық Жәкен Оспанов ауызсу мәселесін айтса, Бозой ауылынан Өтеген Абылай егістікті суару желілерінің мүшкіл жағдайын тілге тиек етті. Сол сияқты ұзынағаштық Анастасия Ключкова Өтеген батыр көшесін жарықтандыруды, қарғалылық Зияш Мамедова зейнетке шығу жасын қайта қарауды сұрады. Сонымен қатар Қарасу, Қайназар, Қызылсоқ, Шиен, Айдарлы, Қасымбек ауылдарынан келген тұрғындар да өздерін толғандырған сұрақтарын қойды. Мұндағы бірқатар өтініш республикалық деңгейде шешуді талап етеді.
– Тұрғындар көтерген мәселелер – жүйелі әрі шынайы. Ауызсу, жол, жарық, мектеп пен мәдени нысандардың жетіспеушілігі – бұл бір күнде пайда болған проблемалар емес. Біз әр өтінішті мұқият қарап, жауапты органдарға жолдаймыз. Ауқымды мәселені Мәжіліс депутаттарымен бірлесіп Үкіметке дейін жеткіземіз, – деді «AMANAT» партиясы орталық аппаратының қоғамдық қабылдау бөлмесінің меңгерушісі Әлия Садырбаева.
Қоғамдық қабылдауға сондай-ақ партияның облыстық филиалының атқарушы хатшысы Ерлан Жақыпов, Жамбыл ауданының әкімі Нұрлан Ертас пен аудан прокуроры Данағұл Аңсаған, жергілікті мәслихат төрағасы Мадияр Әмірғалиев, облыстық мәслихат депутаты Меруерт Молдашева, мекеме, бөлім басшылары қатысты. Жиын соңында сөз сөйлеген партияның аудандық бөлімшесінің атқарушы хатшысы Ықылас Амалбек көтерілген әрбір мәселе бақылауға алынып, назардан тыс қалмайтынын жеткізді.
Серік САТЫБАЛДИЕВ
Жамбыл ауданы
