Ішкі істер министрлігі бүгін брифинг өткізіп, елімізде кісі өлімімен аяқталатын жол-көлік оқиғалары ең көп болатынын өңірлер туралы мәлімет берді. Министрлік өкілі Ақтоты Боранова келтірген дерек бойынша, республика жолдарында жол апатынан күн сайын 10 адам қаза тауып, 70-ке тарта адам түрлі жарақат алады.
Боранова әсіресе республикалық маңызы бар жолдардағы жол апатынан болатын өлім-жітім көрсеткіші ерекше алаңдатып отырғанын жеткізді: жол апатынан көз жұмғандардың жартысы аталған күре жолдарда ажал құшады.
“Қала сыртындағы жолдарда жол апатынан көз жұматындардың көрсеткіші Алматы, Жамбыл, Жетісу, Ақтөбе, Атырау, Ақмола, Түркістан, Маңғыстау облыстарында жоғары” деді министрлік өкілі. Ол аталған облыстардың бәрінде демалыс аймақтары барын, оқушылардың жазғы демалысқа шығып, еңбек демалысына шығу маусымы басталғандықтан азаматтарды жолда жүру ережелерін қатаң сақтауға шақырды. Боранованың сөзінше, күн сайын бір бала жол-көлік оқиғасынан мерт болады.
«Жазғы каникулда балалардың қатысуымен болатын жол-көлік оқиғалары ерекше алаңдатады. Жыл басынан бері еліміздің жолдарында кәмелетке толмаған балалар отырған көліктер 1 046 рет жол апатына түскен. Оның салдарынан 72 бала қаза тауып, 1152 бала жарақат алды. Өкінішке қарай, күн сайын жолдарда бір бала қаза тауып, 10-нан астамы зардап шегеді. Апаттан мерт болған балалардың 67 пайызы, яғни жартысынан астамы жолаушылар, ал қалғаны жаяу жүргіншілер», – деді ол.
