Қонаев қаласында ерекше маңызы бар қоғамдық шара өтті. Облыстық жастар саясаты мәселелері жөніндегі басқарма мен «Жетісу жастары ұйымының конгресі» жастар қоғамдық бірлестігінің ұйымдастыруымен «Фирма БЕНТ» жауапкершілігі шектеулі серіктестігімен ынтымақтастық жөнінде меморандумға қол қойылды. Шара аясында мұқтаж отбасылар мен ардагерлерге арналған қайырымдылық акциясы да ұйымдастырылды.
Волонтерлікті дамытуды көздейтін жаңа меморандум аясында әлеуметтік жобалар жүзеге аспақ. Аталған меморандум еліміздегі еріктілер қозғалысын жаңа деңгейге көтеріп, волонтерлік бастамаларды жүйелеуге, жұмысын үйлестіруге және жастардың қоғамдық өмірге белсене араласуына жол ашады. Ұйымдастырушылардың айтуынша, заманауи фронт-офис ашу арқылы еріктілердің қызметі нақты әрі нәтижелі бағытта жүйеленбек. Игі бастаманың сенімді серіктесіне айналған – Ділмұрат Кузиев басқаратын «БЕНТ» фирмасы бұған дейін де көптеген әлеуметтік жобаны жүзеге асырып келген. Компанияның қолдауымен Алматы қаласында тоғыз мешіт, Ұйғыр драма театры және мәдениет музейі бой көтерді. Бұған қоса олар үнемі балалар үйлеріне, спорт ұйымдарына, әлеуметтік жағдайы төмен отбасыларға тұрақты түрде көмек көрсетіп келеді. Сондай-ақ Пирмұхамед-хаджи Кузиев атындағы отбасылық қор да ел игілігі үшін еңбек етуде. Қор жылдар бойы аз қамтылған отбасыларға, зейнеткерлер мен жетімдерге, дарынды жастарға қолдау танытып, қайырымдылық бағытта 500-ден астам мұсылман студентін шәкіртақымен қамтамасыз етуде. Ділмұрат Кузиевтің жеке қаржысына оннан астам мектеп жөнделіп, заманауи техникамен жабдықталғанын да айта кеткен жөн.
Әлеуметтік қолдау аясында құрылған меценаттар клубы да ел есінде. Аталған ұйым өнер мен мәдениетке үлес қосқан жандарға «Ильхам» сыйлығын табыстап келеді.
«БЕНТ» компаниясымен арадағы ынтымақтастық туралы меморандум – жастар саясатының жаңа серпіні. Бұл қадам қоғам игілігіне бағытталған жобалардың санын арттырып қана қоймай, жастардың белсенділігі мен азаматтық жауапкершілігін көтеруге ықпал етпек.
Құралбек СӘБИТОВ
