«AMANAT» партиясы Кеген аудандық филиалының кезектен тыс ХХІІІ конференциясы өтті. Күн тәртібінде «AMANAT» партиясы Кеген аудандық филиалының төрағасын сайлау және Кеген ауылдық округі әкімі лауазымына кандидат ұсыну туралы екі мәселе қаралды.
Жиынды Кеген аудандық мәслихатындағы «AMANAT» партиясы депутаттық фракциясының жетекшісі Ғалия Дәрубаева ашып, жүргізіп отырды. Ол өз сөзінде: «Белгіленген өкілеттілік нормасына сәйкес, «AMANAT» партиясы Кеген аудандық филиалының кезектен тыс ХХІІІ конференциясына 100 делегат сайланды. Бүгінгі конференция жұмысына 90 делегат қатысып отыр, 10 делегат әртүрлі себептерге байланысты қатыса алмады. Конференция жұмысына «AMANAT» партиясы Алматы облыстық филиалының атқарушы хатшысы Ерлан Жұмашұлы, Кеген аудандық мәслихат төрағасы Алмасбек Нұғыман, партия ардагері Тұрсынбай Тойекеұлы, мәслихат депутаттары, партия ардагерлері мен партия мүшелері, бастауыш партия ұйымдарының төрағалары мен партия белсенділері қатысуда», – дей келе жиынды ашық деп жариялады.
Мемлекеттік Гимн орындалғаннан кейін конференцияның жұмыс регламенті бекітіліп, ұсынылды. Мұнан соң сөз кезегі Кеген аудандық партия филиалы төрағасын таныстыру үшін «AMANAT» партиясы Алматы облыстық филиалының атқарушы хатшысы Ерлан Жұмашұлына берілді. Ол көпшілікке Олжас Маратұлын таныстырып, жаңа қызметке тағайындалуымен құттықтады.
Олжас Маратұлы Тақабаев 1975 жылы 15 сәуірде Кеген ауданында дүниеге келген. Әл-Фараби атындағы ҚазҰУ мен Жамбыл гуманитарлық-техникалық университетін тәмамдаған. Мамандығы бойынша биология және қаржы саласының маманы. Ол білім беру саласында еңбек жолын бастап, кейін мемлекеттік басқару жүйесінде түрлі лауазымды атқарған. Мектеп мұғалімі, директор, ауылдық округ әкімі және аудан әкімі аппаратының басшысы ретінде ұзақ жыл бойы қызмет еткен. Партиялық жұмыста да тәжірибесі мол. Ол 2006 жылдан бастап «AMANAT» партиясының мүшесі. Төраға болып тағайындалғанға дейін Ұзынбұлақ ауылдық округінің әкімі қызметін атқарған.
Шара барысында Ерлан Жұмашұлы партияның бұрынғы төрағасы, партия ардагері Тұрсынбай Тойекеұлының иығына шапан жауып, «AMANAT» партиясы Алматы облыстық филиалының төрағасы Қуат Байғожаевтың Алғыс хатын табыс етті. Ары қарайғы конференция жұмысын жүргізу құқығын жаңа тағайындалған төраға Олжас Тақабаев алды. «Маған сенім артып, қолдау көрсеткендеріңізге алғысымды білдіремін. Күн тәртібіндегі екінші сұрақ бойынша Кеген ауылдық округі әкімі лауазымына партия атынан лайықты үміткер ретінде Ернат Сқақовтың кандидатурасын ұсынамыз. Белгілі болғандай, 2025 жылы 24 тамыз күні Кеген ауылдық округі әкімінің сайлауы өткізіледі», – деген ол үміткер Ернат Сембекұлының өмірбаянымен қысқаша таныстырып өтті.
Маңызды шарада үміткер Ернат Сембекұлы сөз сөйлеп, алдағы сайлау науқанында жауапкершілік жүгі мол екенін айтты. Жиын соңында Кеген ауылдық округі әкімі лауазымына партия атынан кандидат ұсыну бойынша делегаттардың дауысы беріліп, Ернат Сембекұлының кандидатурасы бірауыздан бекітілді.
Дәурен ӘБУТӘЛІПОВ
Кеген ауданы
