Алатау қаласында дәстүрге айналған «Мектепке жол» республикалық акциясы биыл да жалғасын тапты. Жаңа оқу жылы қарсаңында әлеуметтік тұрғыдан аз қамтылған және көпбалалы отбасылардың балаларын қолдау мақсатында ұйымдастырылып жатқан игі шараға жергілікті азаматтар белсене атсалысты.
Солардың бірі – Алатау қаласының тұрғыны, жүрегі кең, жомарт жан Мұрат Шоқайбаев. Ол ауыл азаматтарын бірлестіріп, мектеп жасындағы балаларға қуаныш сыйлады. Нәтижесінде 60-қа жуық оқушы жаңа оқу жылына қажетті мектеп формасы мен кеңсе жабдықтарына қол жеткізді.
Жаңа киім мен түрлі-түсті құралдарын алған балалардың жүзіндегі қуаныш пен шаттық ата-аналардың жүрегін жылытты. Өз кезегінде ата-аналар ұйымдастырушыларға шынайы ризашылықтарын білдіріп, қайырымды істің балаларға үлкен демеу болғанын атап өтті.
– Білім – болашақтың кілті. Балалардың алаңсыз оқып, жақсы білім алуы үшін қолдау көрсету – әрбіріміздің азаматтық борышымыз. Осындай игілікті іске ауыл тұрғындарының бірлесе атсалысқаны қуантады, – дейді Мұрат Шоқайбаев.
Бұл игі бастама – қоғамдағы бірлік пен ынтымақтың, мейірім мен жанашырлықтың нақты көрінісі. Әсіресе, жаңа оқу жылы қарсаңында балалардың шат-шадыман көңіл-күймен мектепке баруы – үлкен бақыт. Алатау қаласының тұрғындары осындай игі шараға бастамашы болып, демеушілік жасаған Мұрат Шоқайбаевқа алғыстарын жеткізіп, үлгілі іс көпке өнеге екенін атап өтті.
«Жақсының жақсылығын айт, нұры тасысын» демекші, ел ішінде ізгілік пен қайырымдылықты дәріптеп жүрген азаматтарымыздың арқасында болашақ ұрпаққа деген қамқорлық арта берері сөзсіз.
Гүлназ КЕҢЕСБАЕВА,
Алатау қаласы әкімінің баспасөз хатшысы
